Díli-SMI, Embasador Portugál iha Timor-Leste, José Pedro Machado Viera, hatete, projetu konsultóriu lia-Portugés ba jornalista sira ne’e importante no sei kontinua iha futuru hodi nune’e bele ajuda jornalista hakerek notísia ho diak.
“Futuru projetu ne’e sei kontinua nafatin fó kursu ba jornalista sira iha Timor-Leste atu nune’e bele hakerek notisias ho lia-portugés ho diak”, dehan Embasador, José Pedro, hafoin hasoru malu ho Sekretáriu Estadu Komunikasaun Sosiál – SEKOMS, iha Palásiu Governu, Kuarta, (26/09).
José Pedro, esplika, objetivu hosi hasoru malu ho SEKOMS, Mericio Juvinal do Reis, koalia kona-ba projetu importante kona-ba konsultóriu lia-Portugés ba jornalista no pesoál sira ne’ebé hala’o knár iha orgaun komunikasaun sosiál nian.
“Enkontru ne’e bázeia ba koperasaun Portugál ho Timor-Leste no presiza liliu iha area komunikasaun sosiá. Projetu importante ne’ebé mak ema hotu hatene husi laboratóriu da língua portuguêsa ba jornalista sira no ami mós orgullu ho projeitu refere, kursu interesante tebes ba formandus no interesantes iha area komunikasaun sosiál liliu ba jornalista sira”, dehan diplomata ne’e.
Vise Prezidente Instituto Camões IP, Gonçalo Teles Gomes, esplika, durante enkontru ho SEKOMS koalia barak liu kona-ba oinsa kontinuasaun projetu konsultóriu lia-Portugés ba jornalista iha futuru oin mai.
“Objetivu prinsipál enkontru ho Sekretáriu Estadu Komunikasaun Sosiál ami koalia kona-ba kontinuasaun apoiu Portugál nian ba Timor-Leste ne’ebé espésifiku iha komunikasaun sosiál, língua portuguêsa importante ba jornalista sira”, tenik nia.
Iha parte seluk, Sekretáriu Estadu Komunikasaun Sosial, Mericio Juvinal dos Reis Akara, apresia ho kooperasaun entre Protugal ho Timor-Leste liu hosi projetu konsultóriu lia ba jornalista sira ne’ebé rezultadu pozitivu ba rekursu jornalista iha rai-laran.
“Ita koalia oinsa kooperasaun nasaun rua kontinua la’o diak tamba ita nia relasaun ne’e mai husi istóriku estratéjiku ita apresia, ita koalia kona-ba oinsa apoia ba ita nia jornalista sira liliu durante ne’e sira fo kursu língua portuguêsa ba ita nia jornalista sira rezultadu kapaas, ita nia jornalista timor oan barak mak hatene portugúes barak maka hakerek notisia iha lingua portugúes, rezultadu pozitivu ne’e apoia hosi Instituto Camões”, katak eis Diretúr NGO Luta Hamutuk ne’e.
Antes remata, eis Prezidente Konsellu Konsultivu Fundu Petroliu – KKFP ne’e, konkorda hodi kontinua projetu konsultóriu língua ba jornalista iha futuru. (Editor, Lariwa).
