Díli-SMI, Ministru Estadu Prezidensial no Konsellu Ministru, Hermengildo “Agio” Pereira, informa, Konsellu Ministru apresia ba relatóriu ezekusaun orsamentu no prosesu aprovizionamentu kona-ba projetu iha Zona Espesiál Ekonómia Sosiál Merkadu – ZEESM iha RAEOA.
Agio Pereira, informa, relatóriu ZEESM ne’ebé aprezenta diretamente hosi Prezidente ZEESM, Mari Bin Amude Alkatiri, kona-ba ezekusaun orsamentál no prosesu aprovizionamentu ba projetu boot hanesan infra-estrutura, irigasaun no eletrisidade.
“Relatóriu ezekutivu kona-ba oinsa mak ezekusaun orsamentál prosesu aprovizionamentu grandes projetus, projetus sira ne’ebé hanesan eletrisidadade, estradas, irigasaun, konsellu ministru apresia aprezentasaun, i agradese aprezentasaun”, dehan Agio Pereira ba Jornalista sira iha Palásiu Governu, Kuarta, (03/10).
Nune’e mós, Agio hatutan, Konsellu Ministru sei hasoru tan ho Prezidente ZEESM iha tempu oin mai hodi aprezenta relatóriu ezekusaun orsamentu no prosesu aprovizionamentu kona-ba asuntu saude no edukasaun.
Tuir nia, pontu prinsipál hosi aprezentasaun relatóriu ezekusaun no prosedementu aprovizionamentu kona-ba atividade ka projetu iha ZEESM nu’udar parte ida atu haree jestaun ba transparansia iha Oe-cusse.
“Iha tempu foun mai sei hasoru malu tan ba rona area edukasaun, saude hodi bele intende didiak loloos kompletu prosesu jestaun Oe-cussi nian”, Tenik Agio.
Nia esklarese, iha reuniaun Konsellu Ministru ba dala-uluk simu relatóriu hosi Prezidente Autoridade Oe-Cusse-ZEESM ne’ebé lidera diretamente eis-PM, Mari Alkatiri.
“Reuniaun Konsellu Ministru nian hahu dahuluk rona Prezidente Autoridade Oe-cusse nian ZEESM fó (laporan), fó relatóriu, ita bolu relatóriu ezekutivu kona-ba oinsa mak ezekusaun orsamentál, prosesu aprovisionamentu grandes projetus”, katak nia.
Iha biban hanesan, Prezidente ZEES, Mari Alkatiri, esplika, nu’udar responsavél ba implementasaun projetu ZEESM iha dever atu halo aprezentasaun relatóriu maibe desizaun tomak iha Konsellu Ministru nia liman.
“Ami tenke mai aprezenta ami nia relatóriu, i depois hein desizaun Konsellu Ministru, seidauk deside orsamentu hira, mai para fó informasaun pre leminár restu desizaun konsellu ministru nian”, dehan Eis Primeiru Ministru VII Governu Konstitusional ne’e.
Durante ne’e, Tribunál Kámara Kontas halo ona auditória ba ZEESM ne’ebé parte Tribunál Rekursu sei halo públikasaun ninia rezultadu iha sitíu ofisiál tribunál nian. (Editor, Lariwa).