Díli-SMI, Tuir relatóriu Polisia Nasional Timor-Leste – PNTL, rejista katak maizumenus ema timoroan hamutuk na’in 22 mak mate iha inisiu fulan Outobru tinan ida ne'e tanba kauza hosi asidente trafiku.
Komandante Jerál Policia Nacional Timor Leste – PNTL, Komisariu, Julío da Costa Hornai, esplika, depois liu tiha fulan Setembru maizumenus timoroan na’in 22 mak mate ho asidente tráfiku ne’ebé variadade.
“Asidente ho insidente ne’ebé mak agora dadaun ita haree domina iha fulan Setembru liu, asidente ida ne’ebé mak bele halakon ema timor oan nain 22 ne’e iha varias asidente”, dehan Komisariu PNTL, Julío Hornai, ba jornalista sira iha Palásiu Prezidensial Aitarak-Laran, hafoin remata enkontru ho Prezidente-da-Repúblika, Kinta, (04/10).
Julío klárifka, kauza hosi asidente tráfiku ne’ebé hamate ema na’in 22 ne’e tanba kondutor dukur durante lori kareta, lori motor la tau kapasete, lanu, halai motor no kareta ho velosidade maka’as.
“Ninia kauza tamba matan dukur lori kareta ou konduz kareta, la uza kapasete lori motor, hemu tua lanu lori kareta ou motor no velosidade la kontrola, kauza hirak ne’e mak hamosu asidente hirak ne’ebe ita hotu asiste iha rai laran”, tenik ne’e.
Lider instituisaun PNTL ne’e mós esplika kona-ba insidente sira ne’ebé akontese durante inisiu fulan Outobru mak hanesan konlitu entre joventude sira.
“Insidente hanesan bai-bain la seluk la le’et ida, mak ita nia joven sira kada-vez sempre uza oportunidade hodi baku-malu, tuda-malu mezmu ke ita nia polisia sira halo atendementu no kapturasaun ba prosesu”, katak nia.
Nia mós haktuir, Prezidente-da-Repúblika rasik fó hanoin atu autoridade seguransa hodi kontinua tau-matan ba movimentu transporte, maibe fila fali ba ema ida-idak hodi kontrola no kuidadu an durante konduz transporte hodi movimentu iha estrada públiku.
“Nia mós fó hanoin mai ita katak, nu’udar timor oan liliu ba autoridade seguransa atu matan nafatin hodi haree movimentu transporte sira, viaturas sira iha terenu, maibé fila fali ona ba ita humanu, nu’udar kondutor nia konsiensia, se ita kondutor ida mak kaer kareta saida mak ita tau em-prioridade”, hatuir nia.
Antes remata, Julío fó hanoin ba kondutor sira atu kuidadu pasajeiru sira nia vida inklui ninia vida rasik wainhira konduz kareta. (Editor, Mateus Barros).