Díli-SMI, Primeiru Ministru VIII Governu Konstitusional, Taur Matan Ruak, hateten, parte Governu seidauk iha informasaun detallu kona-ba akordu sosa partisipasaun asaun iha Conocophillips ne’ebé foin lalais Xefe negosiador Kay Rala Xanana Gusmão iha Bali-Indonézia.
“Ami sei hein ita nia ekipa negosiál to’o para ami hatene informasaun detallu liu tan”, dehan PM, Taur, ba jornalista sira iha Palásiu Prezidensial Aitarak-Laran, Kinta, (04/10), hafoin remata enkontru ho Xefe-de-Estadu.
Tuir TMR, Governu sei haree karik asina akordu sosa partisipasaun asaun iha ConocoPhillips ne’e nesesáriu ba povu no nasaun mak sei-deside atu tau orsan hodi sosa.
“Talves ami sei haree kazu nesesáriu konserteza ita tenki tau (orsan), karik ita atu selu ita tenke tau ona, se-lae ita hola osan iha ne’ebé”, dehan Atúal Primeiru Ministru ne’e.
Nune’e mós, Eis-Brigadeiru Jenerál F-FDTL ne’e, esplika, maske Xefe ekipa negosiador asina ona arkodu sosa partisipasaun asaun iha ConocoPhillips, maibe sei iha faze balun hodi finaliza prosesu asina akordu ne’ebé halo tiha ona.
Ho nune’e, nia hatutan, wainhira hetan informasaun detallu hosi ekipa negosiador mak sei fó informasaun ba públiku.
“Iha ona akordu ida mas ne’e sei iha tan prosesu balun sei la’o tamba ne’e kuandu to’o ona finál sei informa fila fali ba imi”, tenik eis Jenerál Fitun rua ne’e.
Eis Komandante Falintil ne’e, klárifika, durante enkontru ho Xefe-de-Estadu, Francisco Guterres “Lú Olo” informa mós kona-ba alokasaun orsamentu 2019 hodi sosa partisipasaun asaun iha ConocoPhillips nian.
Iha parte seluk, Ministru Estadu Prezidénsia Konsellu Ministru, Hermengildo “Agio” Pereira, hateten, Governu Timor-Leste deside hodi sosa partisipasaun asaun iha ConocoPhillips iha razaun rua mak parte rua ninia ospsaun diferente.
“Ita nia opsaun ne’e la hasoru malu mak hahú diskute oinsá mak Timor-Leste hola asaun ne’ebé ConocoPhillips iha joint venture porsentu 30, ho kalkulasaun orsan millaun $.350”, dehan Agio Pereira, iha Palásiu Governu, Kuarta, (04/10).
Kompañia parsériu sira ne’ebé involve iha sosa partisipasaun asaun Greater Sunrise mak hanesan Woodside nu’udar operadór ho partisipasaun 33,4%, ConocoPhillips ho 30%, Shell ho 26,6% no Osaka Gas ho 10%.
Ekipa negosiador fronteira maritima ne’ebé lidera hosi Kay Rala Xanana Gusmão asina akordu sosa partisipasaun asaun iha ConocoPhillips, iha loron (28/01) iha Bali-Indonézia. (Editor, Lariwa).
