Díli-SMI, Sekretáriu Estadu Komunikasaun Sosiál – SEKOMS, Mericio Juvinal dos Reis, afirma, iha planu atu mantein komunikasaun ho ajénsia LUSA no Rádiu Televizaun Portugal – RTP hodi nune’e bele fornese informasaun ba públiku iha futuru oin mai.
“Ami hanoin atu deskute kona-ba relasaun komunikasoes no kooperasaun ho agensia LUSA. Ami informa mos, ita nia vontade komunikasaun ba Rttl-Ep ho RTP atu identifika sira nia nesesidade iha fatin ne’ebe mak ita bele halo kooperasaun ba oin”, dehan Mericio Akara, ba jornalista sira iha Palásiu Governu hafoin fahe sertifikadu kursu lia-portugés ba jornalista sira, Tersa, (09/10).
Atúal membru VIII Governu Konstitusionál ne’e mós informa, Governu mós iha komitmentu atu oinsa bele iha kooperasaun entre RTTL-ep ho RTP iha futuru tuir programa ne’ebé sustentavel iha area komunikasaun sosiál nian.
Mericio Akarak mós fó agradese no apresia ba kooperasaun entre Portugál ho Timor-Leste ne’ebé kontribui pozitivu tebes ba rekursu umanu jornalista timoroan liuhosi formasaun lia-portugés durante ne’e.
“Durante ne’e kooperasaun la’o ho diak, i pozitivu tebes, espesiálmente ami hili oituan kona-ba formasaun ba língua portuquesa ne’ebé fó ba ita nia jornalista sira”, katak nia.
Iha parte seluk, Sekretária Estadu Negósiu Estranjeiru Portugal, Teresa Ribeiro, klarifika katak iha ona hanoin no posibilidade hakarak trasa planu kooperasaun oinsa RTP bele asesu notísia hosi Timor-Leste nian iha futuru.
“Ita nia posibilidade no funsaun, ami hakarak organizasaun (iha) Portugal liu-liu iha RTP no Timor-Leste bele asessu notísia Timor-Leste”, dehan nia.
Sekretária Teresa Ribeiro mós informa, durante enkontru ho SEKOMS koa’lia kona-ba komunikasaun sosiál liu-liu relasaun ho responsabilidade jornalista nia ba sosiadade liuhosi servisu jornalizmu nian.
“Durante enkontru ho SEKOMS ne’e, ami koa’lia mós kona-ba komunikasaun sosiál, naturalmente atu hadi’a diak liu tan iha area komunikasaun sosial, koa’lia mós kona-ba ita nia responsabilidade iha sosiedade ne’ebé importante tebes ba jornalista sira”, tenik Teresa. (Editor, Mateus Barros).
