Díli-SMI, Sekretáriu Estadu Joventude Desportu – SEJD, Nélio Isac Sarmento, ba oin sei kria kondisaun infra-estrutura no fasilidade ba atleta difisente sira iha Timor-Leste hodi bele fasilita treinamentu iha futuru.
Liu-liu relasaun ho ekipamentu espesiál sira ne’ebé atleta difisiente sira presiza hodi prepara diak liu tan antes partisipa eventu disportu importante sira iha nasionál no internasionál nian.
“Ba oin, atividade desportu ne’e barak maibé presiza kria mós kondisaun fasilidade ba atleta defisientes sira hodi uza halo treinu, tenke koa’lia kona-ba meius ne’ebé mak sira uza ekipamentus espesiál, se karik sira seidauk iha, governu tenke kontribui atu kria kondisoes ida ne’e, kampu ba sira atu treinu governu tenke fó atensaun maka’as ba infra estrutura”, Dehan Nélio, iha Parlamentu Nasionál, Segunda, (15/10).
Atleta maratona difisiente, Teofilo Freitas, ne’ebé foin lalais sai vensedor iha Asian para Games, Jakarta-Indonézia, espresa ninia sentimentu kontente ba membru Parlamentu Nasionál sira tanba bele manan iha eventu internasionál ne’e.
Teofilo, husu ba Estadu atu kontinua tau-matan ba nia no maluk atleta difisiente sira iha rai-laran hodi nune’e kontinua esforsu an lori nasaun Timor-Leste iha mundu internasionál liuhosi eventu disportu sira.
"Hau kontente tebes tanba bele hetan oportunidade hodi mai iha fatin parlamentu nasionál hodi espresa ami nia sentimentu ba nai deputadu sira senti kontenti tebes, espera katak hanoin hetan nafatin no rekonhese ami netik, tamba hau timor oan duni, reprezenta nasaun hau esforsu án nafatin hodi lori povu Timor-Leste ba mundu internasionál”, dehan nia.
Atleta difisiente ne’e mós esplika, antes sai vensedor iha Asian para Games iha Indonézia hodi simu medalla osan-mean, nia sai ona vensedor iha tinan 2017 hodi simu medalla osan-mean rua iha Malaysia.
Parte Parlamentu Nasionál rasik, liuhosi Vise Prezidente PN, Maria Angelina Sarmento, Parlamentu sei fó apoiu tomak ba polítika atleta sira liuhosi apoiu moral no finanseiru hodi nune’e bele kontinua promove altleta difisiente sira iha futuru.
“Hosi parte parlamentu nasionál nian, hanesan fatin ne’ebé halo polítika, hakarak ka lakohi PN tenke fó apoiu polítiku ba ita nia atleta sira, apoiu moral no apoiu finanseiru katak Parlamentu tenke fó hanoin ba governu atu tau prioridade orsamentu hodi dezenvolve seitór desportu”, dehan nia.
Maibe, membru PN ne’e mós husu ba Governu atu kria kondisaun minimu ba atleta difisiente sira hanesan infra-estrutura no fasilidade hodi nune’e bele apoiu sira nia treinamentu iha futuru sei diak liu tan.
“Kria kondisaun minimu, hanesan edifisiu ba treinu nian, alimentasaun disiplina, kuiñesementu akadémiku, teória ho pratika, ne’ebé tenke iha balansu”, tenik deputada ne’e. (Editor, Mateus Barros)
