Díli-SMI, Deputadu hosi bankada Partidu Demokrátiku – PD apoiu lista kandidatura komisáriu Komisaun Anti Korupsaun – KAK foun na’in rua hanesan Sergio Hornai no Aderito Tilman ne’ebé parte Governu propoin tanba sira na’in rua iha kapasidade no meritu ba area justisa nian.
“Hau hanoin ne’e laiha problema tamba uluk mos sira nain rua maka kandidatu, agora mos sira nain rua kontinua, sira hotu ne’e figura importante ba iha ita nia tribunal agora. Ba PD sempre prontu fó apoiu, ba naran sira ne’ebé mak tama iha lista mak, Sergio Hornai no Aderito Tilman tamba ne’e parte PD laiha problema kona-ba asuntu refere”, dehan Deputadu Bankada PD, Mariano Sabino, iha Parlamentu Nasionál, Tersa, (16/10).
Razaun hosi lider partidu opozisaun apoiu lista kandidatura KAK foun ne’e tanba interese estadu no nasaun liu-liu atu lidera no jere instituisaun importante ne’e. Liu-liu oinsa atu asegura funsionamentu KAK hodi garante boa-governasaun no transparansia iha Timor-Leste.
Maske nune’e, eis membru ezekutivu iha VII Governu Konstitusionál ne’e, sente preokupa relasiona ho partidu boot rua iha PN hanesan FRETILIN no CNRT ne’ebé seidauk iha konsensu hodi impede ba eleisaun komisáriu KAK nian.
“Hau hanoin problema komunikasaun tamba uluk husi governu maka propoin ema ida nia naran iha ema ida deit maka mai, kuandu la aseita fali husi bankada governu ne’e la dun los, lolos tenki kordenasaun”, dehan Mariano Sabino.
Eis Governante iha VII Governu konstitusionál ne’e esplika liu tan, partidu boot rua presiza iha konsensu hodi nune’e deputadu hothotu bele apoiu kandidatu komisáriu KAK bele hetan votu minímu 45 para bele hala’o knár ho diak.
"To’o agora ami seidauk iha kordenasaun, maibé ami bele fo hanoin, diak liu kordena ho diak buat ne’ebé mak ba estadu tenki ho diak i kandidatu sira ne’e atu sai komisariu, komisariu KAK tenke hetan apoiu 33, diak liu ita koa’lia ba malu ita fó hotu apoiu labele hetan deit 33 maibé 45 ne’e bele, 65 ne’e hotu para bele halo serbisu”, dehan deputadu ho naran kódiku Asanami ne’e.
Governu lihosi Konsellu Ministru iha loron 11 fulan Jullu tinan 2018 deside prolonga tan mandatu atúal mandatu komisáriu KAK, Aderito Tilman hodi kontinua lidera instituisaun importante ne’e. (Editor, Mateus Barros).