Díli-SMI, Joventude no komunidade Laivai ne’ebé kompostu hosi Suku Ililai no Eukisi, munisipiu Lautem, konsidera instituisaun mídia Rádiu Televizaun Timor-Leste – RTTL la profisionál hodi fó sai informasaun bosok no provokativu.
Porta-voz Joventude no komunidade Laivai, Sebastião Marques “Maubere” esplika, konteúdu notísia RTTL ne’ebé fó sai iha loron 17 Outobru 2018 temi parte seguransa no defeza atu monta postu iha area Buiguira atu prevene konflitu entre joventude Laivai no Laga, ne’e laloos tanba realidade laiha konflitu entre joven Laivai no Laga.
Porta-voz, Sebastião, konsidera RTTL nia informasaun ne’e la kredivél no ezátu tanba la bázea ba faktu loloos ne’ebé viola prinsipiu báziku jornalizmu no kódigu étika jornalístiku nian.
“Relasiona notisia ne’ebe mak fo sai iha kanal Rttl-ep, iha loron 17 de Outubru 2018 ho titulu; F-F-FDTL Sei Monta Postu iha Buiguira Hodi Prevene Konflitu Laivai-Laga” nu’udar informasaun ka notísia ne’ebé la kredivél no ezátu. Tanba, notísia ne’e konsidera nu’udar notísia provokativu no la bázea ba faktu ne’ebé konsidera notísia refere viola prinsipiu jornalizmu no Kódigu Konduta Jornalístiku pontu rua (2) ne’ebé ejize jornalista atu fó sai informasaun bázea ba faktu ne’ebé loloos ka ezatidaun”, dehan Porta-voz, Sebastião, liuhosi Konfrensia Imprensa iha Kampus UNTL, Kaikoli-Dili, Tersa, (23/10).
Sebastião mós preokupa ho kapasidade jornalista RTTL ne’ebé fó sai informasaun la halo konfirmasaun no halo investigasaun klean antes.
“Jornalista RTTL ne’ebé halo kobertura ka reportajen ba asuntu refere la halo konfirmasaun no investiga klean kona-ba kazu refere, ikus mai fó sai notísia ne’ebé provokativu no la loos tuir padraun jornalizmu nian”, dehan porta-voz ne’e.
Relasiona ho públikasaun RTTL ne’ebé laloos no la kredivél, liuhosi porta-voz, joventude no komunidade Laivai kondena RTTL ho razaun hirak tuir mai ne’e:
Kazu akontesementu iha Buiguira laiha relasaun direta ka indereta hosi konflitu entre joven Laivai no joven Laga, tanba to’o ohin loron joven Laivai no Laga iha relasaun diak nafatin hanesan malun-alin ida, familia ida tuir kultura nomós tuir istoria funu durante tinan 24 nia laran;
Nomós, kazu maluk joven ida mate iha area Buiguira la’os kauza hosi konflitu entre joven Laivai no Laga ne’ebé hanesan públika iha RTTL.
RTTL nu’udar instituisaun mídia profisionál presiza konfirma no klarifika didiak antes halo publikasaun ka fó sai informasaun tanba bele hamosu prespsaun negativu iha publiku kona-ba joven Laivai no Laga.
Antes remata Konfrensia Imprensa, porta-voz ne’e hato’o ejizensia hosi joventude no komunidade Laivai katak: Ejize ba Prezidente Konsellu Administrasaun RTTL atu fó orientasaun ba redasaun TVTL hodi halo ratifikasaun ba notisia refere tuir diretu resposta ne’ebé deskreve ona iha Lei Komunikasaun Sosiál no Kódigu Konduta Jornalistiku nian
Nune’e mós, ejize ba redasaun RTTL atu halo retifikasaun ka husu deskulpa ba joven Laivai no Laga ne’ebé nu’udar vitima hosi publikasaun notisia RTTL nian. Nomós husu ba Conselho de Imprensa de Timor-Leste – CI-TL atu fó samada ba redasaun RTTL hodi halo koresaun ba erru hosi publikasaun RTTL nian, no husu atu fó sai notisia ne’ebé ezatu no loloos. (Editor, Mateus Barros).
