Díli-SMI, Governu liuhosi Sekretáriu Estadu Komunikasaun Sosiál – SEKOMS hala’o enkontru ho setor privadu hanesan kompaña Esperansa Timor Oan – ETO Telco TV hodi diskute kona-ba plataforma regulamentu rádiufuzaun iha Timor-Leste.
Sekretáriu Estadu, Mericio Juvinal dos Reis, hateten objetivu hosi enkontru ho responsavél kompaña ETO Telco hodi ko’alia kona-ba regulamentu no lei sira hodi regula atividade mídia iha rai-laran, liu-liu kona-ba atividade rádiufuzaun nian iha rai-laran.
“Hau hakarak aproveita tempu apresia ba inisiativa hirak ne’e, i mós ita iha hanoin para hahu agora ba oin ko’alia kona-ba regulamentu ba lei balun atu bele regula atividade hirak ne’e, objetivu ne’e diak ba governu ba mídia no setor privadu, investidor sira hotu para halo servisu ne’e sente seguru”, dehan Mericio Akara,ba jornalista sira iha Palásiu Governu, Tersa (06/11).
Tuir Mericio, kompaña ETO Telco hanesan kompaña ne’ebé hola parte mídia komunikasaun sosiál nian, no fó sai informasaun ba públiku importante tebes sai parseiru Governu hodi serve diak liu tan povu liuhosi dezeminasaun informasaun.
Eis direitur Luta Hamutuk hatutan, SEKOMS sei tau atensaun masimu ba lisensa frekuiensia ba mídia transmisaun sira liu-liu instituisaun mídia transmisaun ne’ebé seidauk hetan lisensa hosi Autoridade Nacional Comunicação – ANC.
“Governu iha komitmentu atu regula ba mídia sira ne’ebé mak seidauk iha lisensa ba frekuensia, mídia balu livre-los halo’o sira nia ativedade hanesan kanál ne’ebé mak sira hetan uza gratis hetan rendimentu, maibé seidauk hetan kontratu hosi ANC, governu sei regula komitmentu sira ne’e hotu”, dehan nia.
Iha fatin hanesan, reponsavél ETO Telco TV, Nilton Gusmão, apresia ba Governu ne’ebé iha komprimísiu boot atu produz lei hodi regulariza atividade mídia iha Timor-Leste hodi nune’e bele la’o diak iha futuru.
Nune’e mós, nia hatutan, ETO Telco nu’udar instituisaun mídia ne’ebé transmite informasaun iha responsabilidade hodi diskute plataforma regulamentu hodi regula atividade rádiufuzaun iha nasaun foun ida ne’e.
“Ami mós iha mídia ida iha plataforma, ami mós iha transmite kontuidu, ami mós ohin diskute buat balun ho Sekretáriu Estadu Komunikasaun Sosiál, hodi haree ita nia kondisaun negosiu iha area plataforma asinatura. Agradese tebes ba SEKOMS ba ami nia disponilidade ida ne’e fó mós apresiasaun ba ami nia servisu ida ne’e”, dehan nia. (Editor, Mateus Barros).
