Díli-SMI,Líder Partidu Polítiku – ParPol ne’ebé hetan asentu iha Parlamentu Nasionál – PN husu ba líder jerasaun 75 atu labele insulta no minimiza malu maibe oinsa fó liman ba malu hodi dezenvolve nasaun no hadi’a povu nia moris.
Vise Prezidente Bankada Partidu Demokrátika – VPB – PD, Adriano do Nascimento, afirma, prosesu rekonstrusaun estadu no dignifika ukun-rasik-an presiza líder istóriku sira nia unidade no solidariedade ba malu, la’os insulta malu no minimiza malu.
“Prosesu de rekonstrusaun do estadu ao mesmo tempu prosesu de dignifika nasaun, ukun rasik án ne’e lider istoriku, sira labele insulta malu, minimiza malu tenki fo solidariedade ba malu”, dehan Adriano, iha uma fukun PN, Segunda, (17/12).
Ho nune’e, membru PN hosi bankada opozisaun ne’e husu ba líder polítika sira atu labele insulta no hatun malu iha mídia maibe tuur hamutuk hodi rezolve empase polítika ne’ebé dadaun la’o iha rai-laran.
“Líder polítkus sira atu labele insulta malu liuhosi media sosiál, media imprime, no mídia elektronika, maibe husu atu fo liman ba malu, presiza sira tuur hamutuk, la presiza insulta malu ka hatun malu”, tenik Adriano.
Tanba, tuir Adriano, wainhira líder sira la hamutuk mo kontinua insulta malu sei fó impaktu ba prosesu konstrusaun estadu nomós moris povu nian.
Hanoin hanesan mós mai hosi membru PN hosi partidu opozisaun Fretilin, Agustinho Siqueira Somotxo, husu atu lider sira atu labele fahe malu maibe oinsa hamutuk hodi dezenvolve nasaun no lori povu nia moris ba prospériu
“Hau mós kontenti tamba hau nian intervensaun ninia fundu mak ida ne’e duni hau nunka hakarak imi ne’e atu fahe malu tamba hakerek iha ne’eba ne’e unidade asaun, so ita hamutuk mak ita bele halo servisu, servisu mak ita bele hetan progresu”, Tenik Somotxo.
Nune’e mos, Prezidente bankada UDT, Gilman dos Santos Exposto, konsidera ho empase polítika ne’ebé sei la’o dadaun kontinua sai dezafiu ba prosesu dezenvolvimentu nasionál no povu iha nasaun ida ne’e.
Ho nune’e, nia parte husu ba atúal PM Taur Matan Ruak no lider sira seluk atu labele la’o se kutuk ba malu hodi hatun malu no ataka malu maibe oinsa bele hamutuk hodi lori nasaun no povu sai hosi kiak no mukit. (Editor, Lariwa).
