22
Thu, Aug
0 New Articles

Munisipiu 5 Hetan Impaktu Hosi Dezastre Naturais

Autoridade Munisipiu Lautem fahe hela sasan emerjénsi hanesan ai-han ba familia vitima dezastre naturais iha Postu Administrativu Luro. Foto, Paulo Gidae.

Flash News
Typography

Díli-SMI, Maizumenus populasaun hosi munisipiu lima (5) hanesan Baukau, Vikeke, Lautem, Aileu no Ermera sai vitima ba dezastre naturais hanesan udan no anin boot ne’ebé akontese durante fulan Dezembru, tinan 2018 nia rohan.

Sekretáriu Estadu Protesaun Sivil - SEPS, Alexandrinho de Araújo, esplika, parte Governu dadaun ne’e prepara hela mekanizmu hodi apoiu ba vitima dezastre naturais sira.

“Kona-ba dezastre naturais ne’ebe mak afeita ba ita nia populasaun sira iha munisipiu hotu, liliu munisipiu 3 dezde 26 de Dezembru 2018, agora prepara mekanizmu apoiu ba ita nia populasaun sira ne’ebé maka afeta ba dezastre naturais”, Alexandrinho de Araujo, hafoin hasoru malu ho Primeiru Ministru, Taur Matan Ruak, iha Palasiu Governu, Kinta, (10/01).

Mekanizmu apoiu Governu ba vitíma sira ho oin rua mak dahuluk fó asisténsia ai-han no daruak ajuda rekonstrui fila fali uma ne’ebé hetan estraga hosi dezastre naturais.

Tuir dadus ne’ebé pontu fokál SEPS hosi munisipíu 13 relata katak maizumenus ema na’in atus lima (500) mak sai vitíma ba dezastre naturais durante fulan Dezembru nia rohan.

“Neste momentu dadus sira ne’e sei provizoriu kuaze atus lima resin kada munisipiu, maibe dadus sira ne’e dala ruma sei menus tamba balun reverifika fila fali dadus sira ne’e. Maibe ami mos presiza husu dadus ne’e lalais tamba ita nia populasaun balun hein hela tamba ne’e lalais”, dehan nia.   

Parte seluk, tuir informasaun ne’ebé SMI rekoilla hosi munisipiu Lautem hahu iha loron 08 fulan Janeiru distribui ona sasan emerjénsia hanesan ai-han ba familia uma-kain hamutuk rua nolu resin ida (21) ne’ebé hetan dezastre naturais iha loron 26 fulan Dezembru liu ba.

Uma-kain hamutuk 21 ne’e partense Sub Administrativu Luro, Munisipiu Lautem ne'ebe sai vitima hosi dezastre naturais mak hanesan Suku Luro hamutuk uma ualu (8), Suku Kotamutu uma ida (1), Suku Vairoke uma sanolu resin ida (11), no Suku Lakawa uma ida (1).

Prosesu distribuisaun ai-han ba vitíma dezastre naturais ne’e akompaña diretamente husi Administrador Munispiu Lautem, Xeferino dos Santos Sequiera no Diretúr Ministériu Solidariedade Sosiál Munisipíu Lautem, Paulo Gidae. (Editor, Lariwa).

 

Pin It

Follow us on Twitter

Sign up via our free email subscription service to receive notifications when new information is available.