Díli-SMI, Membru Parlamentu Nasional – PN, Antonio da Conceição, la konkorda atu reativa fila fali atividade Grupu Arte Marsial – GAM wainhira Governu rasik seidauk hatene loloos ejistensia GAM refere hodi kontribui ba paz no estabilidade ka lae.
“Se hau mak iha Governu hau propoin para taka. Tamba loke tenki klaru, vizaun saida misaun saida para depois bele minimiza problema sira seluk la’os bandu, bandu ho sentidu diak hatene orientasaun bele loke fali”, dehan Conceição, iha PN, Segunda, (11/02).
Prezidente bankada Partidu Demokratiku – PD ne’e husu ba Governu atu define didiak GAM sira atu nune’e labele hamosu konfuzaun iha públiku kona-ba ejistensia GAM ne’e rasik.
Tuir lider partidu opozisaun ne’e katak realidade GAM konsidera hanesan grupu ne’ebé ejiste atu sai rivalidade ba malu maibe ejistensia arte ritual atu fó solusaun ba problema ruma ne’ebé akontese.
“Ba ami se bele artes marsiais tenke limita tenke estuda ema nia vizaun, ema nia misaun, ema nia ezistensia do grupu i lider. Karakter lider ne’e rasik lori organizasaun ne’e ba ne’ebé, la’os dehan katak grupu bua malus hotu to’o mai mak konfuzaun, artes marsiais, balun dehan katak ita tenki haree ba artes marsiais, arte kultura nian katuas sira iha foho halo sira nia arte rituais la’os atu baku malu sira halo arte rituais nee fo solusaun ba problema, maibe ita kuandu koalia artes marsiais ita koalia fila fali rivalidade dos grupu”, dehan Eis Ministru Edukasaun ne’e.
Eis Governante VII Governu ne’e esplika, nasaun ne’e presiza iha paz no estabilidade la’os mosu instabilidade relasiona ho konflitu entre GAM iha rai-laran.
Parte seluk, Prezidente Komisaun B PN, Aderito Hugo da Costa, hateten, bele reativa fila fali GAM maibe presiza kria regulamentu atu nune’e bele regulariza atividade GAM nian.
“Hau bele konkorda liafuan sira reativa mais tenki iha regulamentasaun, organizasaun ida eziste iha nasaun ida tenki organizadu, estatutu tenki iha responsavel, reativa ho kondisoes mak atu ita haree organizasaun tenki organizadu labele desorganizadu”, dehan Hugo.
Eis Prezidente PN ne’e hatutan, bázea ba lei artemarsial Nú 5/2017 define ona komisaun regulador artemarsial nian hodi tau matan ba atividade GAM iha rai laran. Ho nune’e, atu reativa fila fali ka lae presiza mós haree progresu serbisu hosi komisaun nian.
Tuir observasaun SMI hatudu katak ikus-ikus ne’e asuntu GAM sai preokupasaun públiku iha rai-laran liu-liu ulun-boot defeza no seguransa nian.
Iha semana hirak liu ba mosu konfrontu entre GAM iha Munisipiu Baucau ne’ebé rezulta ema ida mate, balun kanek, sunu uma no motor iha area refere. (Editor, Lariwa).