Díli-SMI, Prokurador Jerál Repúblika – PJR, José Ximenes, hatete, atúal Sekretáriu Jerál partidu Kongresu Nasional Rekonstrusaun Timorense (sigla portugues - CNRT), Francisco Kalbuady Lay, la konsidera notifikasaun hosi Prokurador Jerál ne’ebé diriji ona dala-tolu ba nia.
PJR klárifika katak dala-primeiru haruka karta notifikasaun dirije diretamente ba Kalbuady maibe laiha resposta, no segundu haruka notifikasaun ba Parlamentu Nasional no ikus liu haruka ba dirasaun partidu CNRT nian.
“Hau lakoi fo komentariu por detallu, se por ezemplu ita haruka karta notifikasaun ba nia, nia lakoi mai, ita haruka ba parlamentu nasional nia la serbisu iha parlamentu nasional, hau hanoin por konsiderasaun mesmu la prevista iha lei, mas ita haruka ba tamba nia hanesan dirijente partidu, prokurador titular haruka ba nia prezidente para bele haree”, dehan PJR, José Ximenes, hafoin enkontru mensal ho Prezidente-da-Repúblika, iha Palasiu Prezidensial Aitarak-Laran, Tersa, (12/02).
Ximenes, komenta, maske notifikasaun ba Prezidente partidu CNRT ne’e la tuir estatutu ka kódigu prosesu maibe nu’udar konsiderasaun ida atu bele kolabora didiak hodi tuir prosesu justisa nian.
Maibe, nia hatutan, wainhira Kalbuady Lay lakohi kolabora ho diak ba prosesu justisa mak MP sei foti medida seluk hasoru nian.
“Sim señor, estatutu la preve, kódigu prosesu la preve, mas ne’e hanesan konsiderasaun ida para ita boot (Kalbuady) mai didiak deit, baihira la mai iha medida seluk ita bele buka”, tenik José.
Relasaun ho notifikasaun refere, atúal membru Konsellu Majistratura no membru PN, Carmelita Moniz, kestiona kona-ba notifikasaun hosi Prokuradora Jerál - PJ, Lidia Soares, ne’ebé haruka notifikasaun ba Prezidente partidu CNR, Xanana Gusmão atu fó autorizasaun ba Kalbuady hodi tuir investigasaun kriminál nian.
“Hau hakfodak fali se Prokuradora da Repúblika ida haruka notifikasaun ba Prezidente Partidu ida, ne’e tuir nia kódigu prosesu penal laiha, ita nia Konstituisaun Repúblika mós laiha”, dehan nia.
Nune’e mós, parte lider masimu partidu CNRT rasik, Kay Rala Xanana Gusmão, haruka ona karta protesta ba PJR, José Ximenes relasiona ho notifikasaun ne’ebé diriji ba nia.
Iha parte seluk, partidu opozisaun FRETILIN konsidera karta protesta hosi lider partidu CNRT ba PJR, José Ximenes, nu’udar presaun ka intervensaun polítika ba sistema judisiáriu iha rai-laran.
Toó notisia ne’e públika jornalista SMI seidauk halo konfirmasaun ba parte dirasaun partidu CNRT nomós Francisco Kalbuady rasik kona-ba notifikasaun refere. (Editor, Lariwa).
