Díli-SMI, Eis Falintil no atúal Komandante Jerál Forsa Defeza Timor Leste – FFDTL, Majór Jeneral, Lere Anan Timur, konsidera PSHT no KORK nu’udar Grupu Arte Marsial – GAM Indonéziu nian ne’ebé sempre kria instabilidade iha rai-laran.
Líder instituisaun defeza ne’e deskonkorda ho opiniaun públiku katak Governu mak taka GAM Presaudaraan Setia Hati Terate – PSHT no Kmanek Oan Rai Klaran - KORK.
“Artemarsiais iha timor ne’e nunka iha hanesan KORK - PSHT sira ne’e Indonéziu mak kria iha timor la’os fali ita nia governu mak harii depois taka fila fali ne’e nunka iha, artemarsiais ne’e ezistensia hosi invasun to’o agora ne’e”, dehan Maijór Jeneral, Lere Anan Timur, ba jornalista sira hafoin remata enkontru ho Prezidente-da-Repúblika iha Palasiu prezidensial Aitarak-Laran, Kuarta, (13/02).
Wainhira husu ninia hanoin kona-ba reativa GAM ne’ebé Governu taka ona iha tinan hirak liu ba, eis líder FALINTIL iha rejiaun ponta leste ne’e afirma, la konkorda atu reativa GAM maibe husu organiza atu nune’e bele fasil kontrola.
“Hau dehan la reativa, mas ita nia governu autoriza atu bele organiza sira nian, ho sira organiza propiu nia estatutu i ita nia governu tenke kontrola”, tenik nia.
Relasiona ho konflitu entre GAM foin lalais iha teritóriu laran ne’ebé fó impaktu ba seguransa rai-laran, ejize Parlamentu Nasional – PN iha loron (12/02) realiza plenária ho karater urjensia hodi debate kona-ba oinsa buka solusaun ba problema refere.
Presidente Komisaun B PN, Aderito Hugo da Costa, esplika, parte PN realiza plenária ho karakter urjensia bázea ba pedidu partidu opozisaun FRETILIN, relasiona ho asuntu seguransa no defeza iha rai-laran.
Hosi rezultadu plenária refere, parte Governu trasa ona planu atu kordena ho instituisaun polisial no defeza hodi harii ekipa konjuta hodi buka solusaun ba problema GAM iha rai-laran.
Parte seluk, iha loron segunda, (11/02) membru PN, Antonio da Conceição, la konkorda atu reativa fila fali atividade Grupu Arte Marsial – GAM wainhira Governu rasik seidauk hatene loloos ejistensia GAM refere hodi kontribui ba paz no estabilidade ka lae.
“Se hau mak iha Governu hau propoin para taka. Tamba loke tenki klaru, vizaun saida misaun saida para depois bele minimiza problema sira seluk la’os bandu, bandu ho sentidu diak hatene orientasaun bele loke fali”, dehan Conceição.
Prezidente bankada Partidu Demokratiku – PD ne’e husu ba Governu atu define didiak GAM sira atu nune’e labele hamosu konfuzaun iha públiku kona-ba ejistensia GAM ne’e rasik.
Maske nune’e, parte sosiadade sivil hanesan Asian Justice Right – AJAR, Fundasaun Mahein – FM no Luta Hamutuk konkorda atu Governu reativa fali atividade GAM maibe ho mekanizmu kontrolu ne’ebé mak rigor. (Editor, Lariwa).
