Díli-SMI, Governu liuhosi Sekretáriu Estadu Komunikasaun Sosiál – SEKOMS hakarak kontinua formasaun língua Portugues ba jornalista sira ne’ebé dadaun ne’e fasilita hosi Instituto Camões Portugal.
SEKOMS, Mericio Juvinal Akara, hateten, razaun atu kontinua kooperasaun formasaun língua portugues ba jornalista sira iha futuru tanba rezultadu formasaun durante hatudu sinál pozitivu.
“Hau kontenti ho formasaun língua portugues ne’ebé mak durante ne’e fó ba jornalsita sira nia rezultadu diak, hau ko’alia ho embaxadór para prosesu ne’e bele kontinua”, dehan Mericio Akara, ba jornalista iha Palásiu Governu, Kuarta, (13/02).
Tuir planu SEKOMS atu komitment Governu atu kontinua formasaun língua portugues ba jornalista sira loke to’o iha munisipiu sira iha teritóriu Timor-Leste tomak.
Maibe, nia hatutan, wainhira atu estende formasaun língua portugues ba munsipiu sei uza rekursu timoroan ne’ebé dadaun tuir ona formasaun língua iha Instituto Camões.
“Oinsa bele alarga diak liu tan ba nivél munisipiu, tamba formador sira fó ona treinamentu ba ita nia timoroan, timor iha kapasidade oinsa sa timoroan rasik bele sai formador ba nivél munisipiu”, katak nia.
Nune’e mós, Governu sei uza pesoál sira ne’ebé dadaun sai ona formador hanesan SEKOMS hodi koloka ba apoiu ajensia TATOLI no RTTL.
“Balun sai ona formador diak SEKOMS nia area para oinsa sira apoia fali ajensia TATOLI - RTTL, liliu atu garantia kualidade notisia língua portuges, balun, konsege hetan formasaun diak ita sei konsidera”, tenik nia.
Iha parte seluk, Embaxadór Portugal iha Timor Leste, José Pedro Machado Veira, esplika, asuntu importante ne’ebé ko’alia durante enkontru ho SEKOMS mak kona-ba kontinuasaun kooperasaun formasaun língua ba jornalista sira iha rai-laran.
“Komunikasaun sosial iha lingua portugues, Ami koalia projetu konsultoriu língua ba jornalista tenke halo kapasitasaun ba jornalistas timor oan sira”, dehan diplomata, José Machado.
Kooperasaun projetu konsultóriu língua portugues ne’e hahu iha tinan hirak liu ba hodi fó formasaun língua portugues ba jornalista sira hosi instituisaun mídia no orgaun komunikasaun sosiál sira. (Editor, Lariwa).
