Díli- SMI, Conselho de Imprensa de Timor-Leste – CI-TL komemora loron mundiál Rádiu hamutuk ho jornalista sira no entidade relevante sira liuhosi atividade feira no diskusaun públiku kona-ba jornalizmu livre no independente iha prátika polítika redasaun nian.
Iha serimónia abertura atividade komemorasaun loron mundiál rádiu, Konselleiru José Maria Ximenes, hatete, ejisténsia rádiu fó influénsia tebes ba komunidade Timor nia prosesu luta ba independénsia ne’ebé hahú hosi tinan 1975 to’o 1999.
Konselleiru esplika, depois de independénsia, Ejisténsia rádiu kontinua fó kontribuisaun ida maka’as tebes ba prosesu dezenvolvimentu iha Timor-Leste.
“Iha dezafiu boot tebtebes, ho dezenvolvimentu era dijitalizasaun, oinsá atu suporta rádiu sira ne’e atu ejiste nafatin, maka husu ba Governu atu bele suporta nafatin sira tanba iha era dizitalizasaun ne’e ameasa ba rádiu sira,” dehan Konselleiru Jose Ximenes.
Eis diretúr Timor Post ne’e hatutan, Objetivu hosi komemorasaun ne’e maka bele hasa’e konsiénsia públiku no entidade sira Estadu nian atu hatene papél meiu komunikasaun rádiu nian iha prosesu hari’i demokrasia.
Iha komemorasaun ne’e, realiza mós diskusaun aberta ida, iha ne’ebé partisipa hosi Prezidente Conselho Imprensa, reprezentante Prezidente Konsellu Administrasaun RTTL,EP, Diretór Centro Radio Comunidade (CRC), Prezidente Asosiasaun Rádiu Komunidade Timor-Leste nomos hala’o transmisaun direita hosi Rádiu Metro 94.7 mhz.
Partisipa iha Komemorasaun Loron Munidiál Rádiu maihosi Diretores Orgaun no Meiu Komunikasaun sosiál sira, Jestores Rádiu Komunidade munisípiu 12 inklui Oe-cusse, ofisiál Mídia F-FDTL no PNTL, estudante Komunikasaun Sosiál UNTL no UNITAL, reprezentante UNESCO no AGH-Mitmenchen no jornalista sira hosi orgaun no meiu komunikasaun sosiál sira iha Dili laran.
Eventu ne’e realiza tanba serbisu hamutuk entre Conselho de Imprensa de Timor-Leste (CI) ho Diresaun Nasionál Sentru Rádiu Komunidade (DNCRC), UNESCO no AGH-Mitmenchen hodi komemora loron mundiál ba rádiu refere. (Editor, Lariwa).
