Díli-SMI, Observador polítika Universidade Nasiona Timor Lorosa’e – UNTL, Camilo Ximenes, hateten, wainhira estrutura VIII Governu la kompletu mak bele falla iha ezekusaun Orsamentu Jerál Estadu – OJE 2019 tanba susar tebes atu halo kontrolu ho efisiente.
“Orsamentu aprova ho montante boot, i atu halo ezekusaun tenki iha Ministru, ou Sekretáriu Estadu ou Vise, orsan aloka ba ne’eba mais ema laiha se mak atu bele ezekuta orsan, karik bele ezekuta bele diak mos se mak bele kontrola, buat sira hanesan ne’e fó impaktu negativu ba ministeriu ne’ebé mak iha”, dehan, Camilo Ximenes, ba jornalista SMI, iha Kampus UNTL, Kinta, (14/02).
Tuir Camilo, Xefe-de-Governu, Taur Matan Ruak, presiza halo ona asaun konkreta kona-ba membru Governu na’in 9 ne’ebé seidauk hetan toma pose hosi Prezidente-da-Repúblika to’o ohin loron.
Tanba, Dosente UNTL ne’e fiar katak Xefe-de-Estadu, Francisco Guterres Lú Olo, sei la aseita wainhira Governu la troka ka subtitui lista membru Governu ne’ebé pendente.
“Hau hanoin ne’e fila fali ba kompeténsia primeiru ministru nian dentru iha AMP laran konvoka reuniaun, extra-ordináriu ruma hodi husu lider AMP sera que posivél substitui, se la substitui, hau hanoin imposivél prezidente mós aseita”, katak nia.
Akademista ne’e sujere ba Prezidente-da-Repúblika no Primeiru Ministru atu iha konsensu hodi nune’e bele rezolve lalais membru Governu ne’ebé sei hetan toma pose.
No, nia mós rekomenda diak liu lori naran lista kandidatu membru Governu ba Tribunal Rekursu hodi nune’e bele konfirma lalais erru ne’ebé sira komete.
“Naran sira nee tenki haruka ba Tribunal Rekursu hodi nunee haree erru ou problema ruma ne’ebé mak sira komete nia posibilidade la’o oinsa, hau nia haree katak iha posibilidade naran sira ne’e ba tribunal rekursu hodi bele desidi”, tenik nia.
Parte seluk, VIII Governu ne’ebé lidera hosi Taur Matan Ruak, kontinua mantein ho lista membru pendente hodi hein desizaun hosi Prezidente-da-Repúblika atu halo toma pose.
Pozisaun ne’e aprezenta hosi Ministru Reforma Lejizlativu Asuntu Parlamentar, Fidelis Mangalhães, hafoin remata enkontru ho líder bankada parlamentar iha uma-fukun PN semana kotuk liu ba.
Antes ne’e, Prezidente-da-Repúblika rejeita lista membru na’in 9 hodi fó toma pose tanba deskonfia involve kazu korupsaun
Kandidatu membru Governu na’in 9 ne’ebé seidauk hetan toma-pose mak hanesan Francisco Kalbuady Lay, Amandio Benevides, Antonio Verdial, Nelson Turquel, Helder Lopes, Sergio Lobo, Alfredo Pires, Samuel Marçal no Rogeiro Mendonça. (Editor, Lariwa).