Díli-SMI, Universidade Nasional Timor Lorosa’e – UNTL nu’udar universidade públiku uníku iha rai-laran ne’ebé tuir loloos ema hotu asesu maibe deskonfia nakonu ho estudante sira hosi familía veteranu sira tanba asesu liuhosi rejime espesiál.
Prezidente Komisaun G Parlamentu Nasional – PN, Albina Marcal, mós preokupa no husu atu UNTL simu estudante sira hosi rejime espesiál tenke bázea ba kapasidade universidade nian.
Albina afirma, antes ne’e parte UNTL no Ministériu Edukasaun – ME relata ba Komisaun G PN hodi simu de’it estudante hamutuk ema na’in rihun tolu (3.000) maibe ikus mai hakarak simu fali estudante hamutuk ema na’in rihun sanolu resin lima (15.000).
“Bainhira halo audénsia ho Magnifiku Reitór ho ministru ami rekomenda katak regimi espesiál ne’ebé mak liga ba iha veteranus no veteranus, estudantes sira ne’e tuir kapasidade ne’ebé mak UNTL iha, i sira hato’o mai ami katak sei simu (tres mil ou dois) maibe akontese ami rona katak sira hakarak atu simu (15 mil)”, dehan Albina, iha PN, Segunda, (18/02).
Haree ba mudansa númeru rekrutamentu estudante atu asesu UNTL ne’e, parte PN Komisaun G sei bolu magnifiku reitor UNTL, Ministra Edukasaun nomós Sekretáriu Estadu Veteranu nian atu nune’e justifika razaun ba mudansa iha prosesu rekrutamentu estudante foun ne’e.
“Iha hanoin atu bolu Magnifiku Reitór ho ministru, hosi Sekretáriu Estadu Veteranus nian, hosi Komisaun Homenagem para ami bele rona besik kona asuntu ne’e. Ami sei bolu iha tempu badak”, dehan deputada hosi bankada CNRT ne’e.
Iha biban hanesan, Ministru Reforma Asuntu Parlamentares – MRAP, Fidelis Leite Magalhães, hateten, Governu la halo diskriminasaun ba estudante sira iha prosesu rekrurtamentu maibe tanba kondisaun infra-estrutura UNTL ne’ebé labele simu estudante ho númeru boot.
“Governu laiha intensaun halo diskriminasaun ba veteranus, veteranas nia oan sira soke ita hasoru realidade faktu konkretu katak ita nia kapasidade instituisaun untl nian mak la too ho emenda ne’ebe boot”, dehan Fidelis.
Relasiona ho prosesu rekrutamentu ne’ebé deskonfia nakonu ho aktu diskriminasaun, foin lalais ne’e estudante sira ne’ebé la pasa iha UNTL halo protesta ba mekanizmu rekrutamentu hosi UNTL foin lalais ne’e.
Durante ne’e, públika kestiona sistema no mekanizmu rekrutamentu hosi Ministériu Edukasaun kona-ba rejime espesiál ne’ebé fó impaktu ba povu babain nia ona atu asesu estudu iha UNTL.
To’o notísia ne’e públika SMI seidauk halo konfirmasaun ba parte kompetente ne’ebé iha ligasaun direta ho públikasaun ne’e. (Editor, Lariwa).