Díli-SMI, VIII Governu liuhosi Komisaun Funsaun Públiku – KFP planea ona atu halo promosaun ba funsionáriu públiku hamutuk ema na’in rihun ida atus hat lima nolu resin lima (1.455) ne’ebé tuir ona rekejitu atu promove iha tinan ida ne’e.
Planu promosaun ne’e aprezenta hosi Prezidente KFP, Faustino Cardoso, ba Primeiru Ministru, Taur Matan Ruak, iha loron segunda, (18/02) foin lalais ne’e.
Durante audénsia ho líder Governu Aliansa Maioria ba Progresu - AMP, Prezidente KFP aprezenta pedidu alterasaun artigu balun hosi Dekretu Lei Nú 1/2018 kona-ba definisaun promosaun atu nune’e labele hamosu konfuzaun iha intrepretasaun.
“Komisaun Funsaun Públika mai hatoo nia pareser inkluindu mós paraser atu halo alterasaun ba Dekretu lei nú 1 2018, liliu ba iha artigu 7 atu hodi define ho mós no loloos kona-ba konteudu atu bele evita interpretasaun ne’ebé la hanesan”, dehan Faustino.
Faustino esplika, konfuzaun hosi Dekretu Lei Nú 1/2018 artigu 7 mak relasaun ho promosaun ne’ebé sei hamosu konfuzaun mak: “hau fo ezemplu, se 10% mai husi 10% vaga grau A nian ka ou grau B nian atu ba iha grau A nian ne’e mak la hanesan”.
Nia mós klarifika, parte Primeriu Ministru konkorda ho pedidu alterasaun Dekretu lei refere ne’ebé iha tempu badak sei deside iha Konsellu Ministru.
Maske nune’e, Prezidente KFP afima prosesu promosaun ne’e sei hatama iha jornada orsamentu tinan 2020 bázea ba kada Ministériu hafoin funsionáriu hirak ne’e bele hetan promosaun.
Atúal totál funsionáriu públiku hamutuk ema na’in rihun hat nolu (40.000) ne’ebé kompostu hosi funsionáriu permanente hamutuk ema na’in rihun tolu nolu resin tolu no funsionáriu kazual hamutuk ema na’in rihun hitu (7.000). (Editor, Lariwa).
