Díli-SMI, Membru Parlamentu Nasional – PN hosi partidu opozisaun konsidera Sekretáriu Jerál partidu Kongresu Nasional Rekonstrusaun Timorense - CNRT (sigla portugues) hakarak uza uma fukun PN hodi sai hanesan abrigu atu hases an hosi prosesu justisa ne’ebé dadaun nia infrenta.
Deputadu hosi partidu FRETILIN, José Agustinho Sequeira “Somotxo” sente hakfodak wainhira haree Kalbuady mosu iha PN hodi retoma fali pozisaun nu’udar deputadu hosi bankada AMP nian.
Tanba tuir Somotxo, durante ne’e Kalbuady nu’udar parte hosi notifikadu hosi Ministériu Públiku – MP atu hatan iha tribunal relasiona ho krime ne’ebé nia komete.
“Hau hakfodak tanba deputadu Francisco Kalbuady Lay mosu fila fali parlamentu ne’e hau lahatene se de’it durante tempu naruk polímika ne’e mosu nia hanesan notifikadu ba hatan iha tribunal agora derepente mosu iha nee hau lahatene parlamentu ka instituisoes oragaun soberania nee hanesan abrigu ba ema ne’ebé komete krime, AMP tenki esplika ba públiku tomak”, dehan “Somotxo” iha PN, Segunda (25/02).
Iha fatin hanesan, Francisco Kalbuady, rekuiñese katak nia parte simu duni karta notifikasaun ida hosi MP iha fulan kotuk maibe nia rasik hakerek karta ofisiál ba Prokurador hodi labele atende karta notifikasaun refere relasiona ho asuntu saúde no problema partikular nian.
“Polímika sai tiha ona fulan ida resin i atu hato’o ba públiku, iha fulan ida liu ba, hau simu duni notifikasaun hosi prokurador maibe altura hau simu hau hakerek karta ofisiál ba prokurador katak hau iha asuntu partikular i nune’e mos haree hau nia saúde, hau ba duni liur tama duni hospital opera”, dehan Kalbuady hodi responde preokupasaun Somotxo nian.
Eis Ministru Turizmu ne’e mós rekuiñese katak foin lalais ne’e simu tan notifikasaun hosi MP ne’ebé diriji ba prezidente partidu maibe kontinua labele atende notifikasaun refere tanba halo hela tratamentu saúde iha rai-liur.
“Depois iha karta seluk mai fali hau nia perezidente xanana katak atu autoriza hau ba iha ne’eba, maibe hau liu tiha ona ba rai liur komesa halo tratamentu iha hospital mak hau rona notifikasaun foun mai atu halo torturasaun, mais prontu durante hau sei moras hau la fila”, dehan nian.
Responde kona-ba uza PN atu subar hodi hases an hosi justisa, Kalbuady Lay, esplika, nia retoma fali pozisaun nu’udar deputadu la’os atu subar an hosi imunidade maibe sempre kolabora justisa hodi presta ninia deklarasaun ba MP tuir notifikasaun ne’ebé diriji ba nia.
“Hau atu husu ba prezidente ho uma fukun no ita-boot sira, hau la mai subar iha imunidade nia okos. i hau prontu atu kopera ho seitor justisa, hau prontu ba presta hau nia deklarasaun iha ministériu publiku”, tenik nia.
Ohin, loron 25 Fevereiru, lista deputadu partidu CNRT númeru 4 ne’e retoma fali ninia pozisaun nu’udar membru PN ne’ebé durante ne’e subtitui hosi deputada Virgina Anabela.
Kalbuady Lay fila mai timor iha loron Sábadu (23/02) foin lalais ne’e hafoin besik fulan ida iha estranjeiru hodi hala’o tratamentu saúde. (Editor, Lariwa).