Díli-SMI, Atúal Komandante Jerál – KomJer, Komisariu, Julio Hornay, husu ba membru instituisaun Polisia Nasional Timor-Leste – PNTL inklui públiku tomak atu kolabora no serbisu hamutuk ho komandante foun ne’ebé sei troka nia hodi hadi’a diak liu tan instituisaun polisial iha futuru.
“Hau nia mensajen espesiál liu ba superior sira hotu Komandante Jeral i Segundu Komandante Jerál nomeadu atu sai legal komandate geral oficialmente hot-hotu suporta I apoiu tomak superior, ita apoiu tamak ba ita nia komandante foun bele la’o ba oin, husu ba komunidade tomak nu’udar timoroan hot-hotu kopera apoiu malu ba ita povu timor bele la’o hakmatek halao’o aktividade moris lor-loron nian”, dehan Julio Hornay, ba jornalista sira hafoin hasoru malu ho Prezidente-da-Repúblika, iha palasiu prezidensial Aitarak-Laran, Kinta, (21/03).
Komisariu, Julio, esplika, sente kontente no orgullu durante misaun tinan hat hamutuk ho Segundu Komandante Jerál, Komisariu, Faustino da Costa, ne’ebé hala’o ona serbisu lubuk ida hodi mellora instituisaun PNTL nian, maske hetan obstaklu barak durante sira nia mandatu.
Julio, hatutan, nia sente kontente ho desizaun Governu ne’ebé hili komisariu, Faustino da Costa, ho ninia Vise Mateus Fernandes, hodi subtitui nia tanba sira iha kapasidade no kuiñesementu ne’ebé diak hodi dezenvolve instituisaun PNTL.
“Hau sente kontente tebes ema ne’ebé subtitui hau ne’e ema ida ne’ebé mai hosi kareira i mós ema ne’ebé kuiñesementu ho kapasidade ne’ebé diak nomos Komandante Adminitrasaun ne’ebé sai nu’udar segundu komandante ne’e mós la’os ema leet ida, nia mós esperesia lubuk ida iha misaun tinan ha’at nia laran”, dehan Julio.
Antes ne’e Konsellu Superio Seguransa hatama lista pakote rua hanesan pakote primeiru mak atúal Komisariu Julio Hornay ho atúal Komandante Corpo Seguransa Pesoal – CSP, Afonso dos Santos, no pakote segundu, atúal Segundu Komandante Jeral, Komisariu, Faustino da Costa ho atúal Xefe Administrasaun PNTL, Mateus Fernandes.
Foin lalais ne’e, VIII Governu liuhosi Konsellu Ministru aprova ona pakote segundu ne’ebé kompostu hosi Komisariu, Faustino da Costa ho Mateus Fernandes, hodi lider instituisaun PNTL ba mandatu tinan hat oin mai.
Atúal KomJer, Julio Hornay no Adjuntu, Faustino da Costa, ninia mandatu sei remata iha loron 27 fulan Marsu tinan ida ne’e. (Editor, Lariwa).
