PN no Líder Nasionál Husu Governu Trata Negosiante Ambulante ho Justu

Negosiante ambulante sira halo hela atividade negósiu iha kapital Díli. Foto, Internete.

Flash News
Typography

Díli-SMI, Reprezentante povu iha uma-fukun Parlamentu Nasionál-PN no líder nasionál sira husu ba VIII Governu atu rezolve problema negosiante ambulante sira iha rai-laran ho justu no labele uza mekanizmu tiru ho gás Lakrimojênu.

Tuir membru PN hosi opozisaun bankada Frente Revolucionária de Timor-Leste Independente – FRETILIN, Nelia Menezes, hateten, kestaun negosiante ambulante sira la’os foin mak akontese maibe dezde uluk ne’ebé Governu presiza buka solusaun ba problema refere.

“Kestaun vendedor ambulantes la’os foin akontese maibe kuaze tinan-tinan ita haree katak problema ne’e kontinua iha, parte Governu nian presiza hanoin ne’ebé justu ba oinsa mak atu akumula fasilita ita nia vendeddor ambulante sira, tamba ita hatene katak negósiu ne’ebé sira halo la’os estraga nasaun”, dehan Nelia Menezes, liuhosi plenária, Segunda, (08/03).

Deputada hosi bankada opozisaun ne’e mós sujere ba Governu atu loke espasu ba negosiante ambulante sira la’os taka-dalan hodi negosiante sira buka moris hodi sustenta família.

“Oitavu governu hanesan prinsipiu mudansa ba progresu, buka atu hanoin oinsa kria espasu ka solusaun justu ba ita nia vendedor sira, hakarak sujere ba governu atu labele taka dalan ba ita nia maluk sira, konseitu ne’e buka atu bele mós solusiona ka buka atu konsidera mós ba vendedor ambulante sira”, dehan Nelia.

Hanoin hanesan mós mai hosi deputadu Aliansa Mudansa ba Progresu – AMP, Noe da Silva, katak, atu rezolve problema negosiante ambulante sira Governu presiza halo estudu hodi loke espasu ba negosiante sira halo sira nia negósiu.

“Atu evita negosiante ambulante, bele karik estadu tau mos ba ita nia negosiante ambulantes sira para koloka iha fatin neebe mak estadu indika ba sira, para sira serve faan iha fatin sira ne’ebé mak estadu indika ba sira”, dehan Noe da Silva.

Relasiona ho atuasaun hosi membru Polisia Nasional Timor Leste – PNTL hasoru negosiante ambulante sira foin lalais ne’e,  Premiadu Nobel da Paz, José Ramos Horta, hakerek iha ninia pajina Facebook husu ba autoridade munisipiu halo negosiasaun ho Governu sentral hodi fasilita espasu ba negosiante ambulante sira faan sasan.

Tuir nia, autoridade munisipiu Díli labele duni negosiante ambulante sira maibe presiza hakoak no tulun sira tanba negosiante hirak ne’e mós halo ona kontribuisaun ba dezenvvolimentu ekonómia Timor-Leste. (Editor, Lariwa).