Díli-SMI, Instituisaun Polísia Nasional Timor-Leste – PNTL sei sei halo pasa-revista ba transporte públiku hodi prende kareta no motor Governu nian ne’ebé halo movimentu durante loron feriadu selebrasaun paskua nian wainhira laiha dokumentu autorizasaun hosi instituisaun ka superiór sira.
Komandante Jerál PNTL, Komisáriu, Faustino da Costa, husu ba komandu eskuadra polísia sira atu hapara ka prende transporte Estadu no Governu nian ne’ebé laiha autorizasaun husi superiór maibe halo movimentu iha tempu feriadu paskua nian.
“Husu ba komandu hotu hotu para transportes estadu nian, governu nian ne’ebé laiha autorizasaun, polísia sei halo prende”, dehan Komisáriu, Faustino da Costa, ba jornalista sira foin lalais ne’e hafoin hasoru malu ho Prezidente-da-Repúblika, iha palásiu prezidensial Aitarak-Laran.
Faustino, informa, parte komandu fó ona apelu ba komandu PNTL iha munisipiu sira no nasionál atu garante seguransa ba sarani katólika ne’ebé atu selebra loron páskua nian.
Tuir Komisáriu ne’e, seguransa ba loron páskua importante atu bele garante movimentu sarani katólika ho livre durante loron selebrasaun páskua nian.
“Páskua ne’ebé atu mai ramus ita liu tiha ona, ita atu tama ona iha páskua. Iha páskua, PNTL orienta komandu munisipiu sira, atu aseguara ema hotu hotu bele hala’o nia atividade páskua nia ho livre”, dehan Faustino.
Nia reforsa tan, maske institusionamente hasoru dezafiu barak liu-liu menus kombustivel atu apoiu parte operasional hodi hala’o seguransa durante loron selebrasaun páskua, maibe nu’udar resposabilidade komandu prontu garante seguransa iha loron selebrasaun páskua nian.
“Ba páskua laiha problema ami husu para ba oin, kombustivel nune’e mós manutensaun viatura, prosesu aprovizionamentu sei lao hela”, tenik nia. (Editor, Aquino no Ynha).
