Díli-SMI, Governu liuhosi Sekretária Estadu ba Igualdade no Inkluzaun – SEII, kritika mídia nasionál laiha sensivél ba jéneru tanba maioria publikasaun foka ba atividade mane nian kompara ho atividade feto ne’ebé mós importante iha konstrusaun estadu.
Tuir SEII, Maria José Fonseca, durante ne’e publikasaun mídia nasionál seidauk halo balansu kobertura ba sensivel jéneru. Tanba realidade mídia fó espasu barak liu ba publikasaun asuntu mane nia, la fó importansia ba atividade feto iha aspeitu oi-oin.
”Ne’e politika maibe realidade, dala-barak media sira halo kobertura foka liu ba maluk mane sira nia area no foka liu ba saida mak domina hosi maluk mane sira nian ou atividade mane sira nian no seidauk kobertura naton ba maluk feto sira nia aktividade”, dehan Maria Fonseca, hafoin remata sesaun dahuluk konférensia Internasional Díli Dialogu Forum – DDF, iha Salaun Katedral, Vila-Verde, foin lalais ne’e.
Membru Governu ne’e konsidera feto potensiál barak iha rai-laran ne’ebé ho kapasidade iha area oi-oin hodi kontribui ba dezenvolvimentu nasionál.
“Maluk feto sira potensiál iha aldeia, iha suku, iha munisipiu, ita hasoru feto potensiál barak, sira soru tais, sira iha desportiva, sira involve iha negósiu , setór privadu, feto iha kapasidade iha potensiál barak maibe dala-barak maluk mídia sira haluhan tiha atu kobre ida ne’e”, katak nia.
Tuir loloos mídia nu’udar pilar importante ida ne’ebé fornese informasaun ba públiku no sai hanesan “Watch Dog” iha responsabilidade moral atu asegura interese públiku kona-ba asuntu jéneru no inkluzaun nian.
“Mídia loloos atu sai dalan ida atu ema hetan informasaun loloos hodi fahe informasaun ba públiku no sai “Watch Dog” atu asegura interese públiku nu’udar jeneru no inkluzaun”, tenik nia.
Governante ne’ebé toma-konta ba promosaun asuntu jéneru no inkluzaun fó ninia preferensia katak durante eleisaun jerál no eleisaun antesipada mós mídia ladun fó espasu kobertura barak ba feto nia involvimentu durante kampañia polítika nian.
Maske iha ona esforsu balun hosi mídia eletróniku (televizaun no rádiu) ne’ebé fó espasu kobertura maibe seidauk sufisiente.
Tanba ne’e, husu ba jornalista no mídia nasionál atu bele tau mós prioridade kobertura ba asuntu feto nu’udar parte hosi hodi promove jéneru iha rai-laran. (Editor, Lariwa).
