Díli-SMI, Instituisaun Polísia Siéntifiku Investigasaun Kriminal (PCIC – Sigla Portugues) ne’ebé establese iha tinan 2014 rekuiñese seidauk iha kapasidade rekursu umanu ne’ebé naton hodi halo investigasaun konta deskuiñesidu (ID falsu) iha media sosiál hanesan Facebook.
Diretúr nasional PSIK, Vicente Fernandes, hateten, krime burla la’os kazu krime ne’ebé fasil atu hetan investigasaun lalais, presiza apoiu ho rekursu umanu no fasilidade ne’ebé sufisiente.
“(Kazu krime burla) ne’e la fasil atu investiga tamba ne’e presiza rekursus umanu i ekipamentu atu hala’o investigasaun ba krime hirak ne’e”, dehan Vicente Fernandes, iha Salaun Ministeriu Solidariedade Sosiál – MSS, hafoin remata seremónia aniversariu PSIK ba dala 5, Tersa, (14/05).
Liga ho progresu teknólojia liu-liu relasaun ho media sosiál hanesan facebook ne’ebé ema uza identidade falsu hodi foti no inventa ema seluk nia dadus konsidera hanesan komete krime burla.
No, Timor-Leste nu’udar nasaun foun hetan impaktu boot hosi dezenvolimentu teknólojia hanesan facebook.
“Kona-ba konta deskuiñesidu (ID falsu) ohin loron ita nia nasaun ita ho konsekuénsia avansu teknólojia hanesan facebook no sira seluk tan, iha ne’eba ema bele uja hodi komete krime”, dehan Vicente.
Iha sorin seluk, Ministru Justisa, Manuel Carceres, esplika, maske Timor-Leste hetan ukun-an ona liu dekade ida resin maibe to’o ohin loron seidauk iha lei sibernetiku hodi kontrola uza media sosiál.
“Ita seidauk iha lei ida bolu krime sibernetiku husu ita nia na’i deputadu sira halo took lei ida kona-ba krime sibernetiku depois ita bele kontrola”, katak Carceres.
Nune’e mós tuir kódigu penal seidauk iha lei kona-ba defamasaun tanba ne’e labele halo kapturasaun ba ema sira ne’ebé uza ID falsu hodi defama ema iha media sosiál.
Relasiona ho media sosiál ka krime uza facebook, Ministru Reforma Lejizlativa ba Asuntu Parlamentár, Fidelis Leite Magalhães, esplika, VIII Governu konstitusional seidauk iha hanoin atu regula uza media sosiál iha Timor-Leste. (Editor, Lariwa)