22
Thu, Aug
0 New Articles

PR Fiar Diplomata Timoroan Sira Sei Intensifika Relasaun Internasional

Embaxadór, Olimpio Branco, Isilio Coelho no Lisualdo Gaspar, wainhira hetan pose iha Palásiu Prezidensiál Aitrarak-Laran, Dili. Foto, Mídia PR.

Flash News
Typography

Díli-SMI, Prezidente Republika, Francisco Guterres “Lú Olo” konfia kapasidade diplomata timoroan ne’ebé reprezenta estadu Timor-Leste iha estranjeiru sei halo esforsu oi-oin hodi intensifika relasaun bilateral entre estadu Timor-Leste ho nasaun sira seluk iha mundu.

Konfiansa ne’e hato’o sai liuhosi diskursu PR hafoin fó pose ba embaxadór timoroan na’in tolu (3) ne’ebé atu destaka iha Brasil, Estadus Unidus no Nova Zelandia, iha Palásiu Prezidensiál Nicolau Lobato, Tersa, (13/08).

Nomeasaun diplomata timoroan na’in tolu hanesan Olimpio Branco, ba emabaxadór iha Brasil, Isilio Coelho, emabaxadór ba Estadu Unidus Amerika no Lsualdo Gaspar, sai embaxadór iha Nova Zelandia ne’e  bázea ba Dekretu Prezidente Repúblika   númeru 36/2019, 37/2019 no 38/2019.

Diplomata timoroan na’in 3 ne’e ho esprénsia ne’ebé naton iha relasaun internasional nomós nu’udar funsionariu Ministeriu Negosiu Estranjeiru no koperasaun iha tinan barak nia laran.

“Haree ba esperiénsia tinan barak Embaixadór na’in-tolu iha relasaun internasionál.  Prezidente Repúblika konfia katak diplomata sira sei intensifika liu relasoens bilaterais Timor-Leste ho nasaun refere”, dehan Xefe Estadu ne’e.

Embaxadór Olimpio Branco, iha dezembru 2002 to’o setembru 2005 indijitadu nu’udar Vise-Ministru Negosiu Estranjeiru no Kooperasaun Timor-Leste. Tinan 2005-2010 sai Embaixadór Timor-Leste ba Repúblika Popular da China no tinan 2012-2016 sai Embaixadór Timor-Leste ba Repúblika Kuba.

Olimpio ho kualifikasaun no nivél estudu mak hasai Kursu Tékniku Agikultura iha Institutu Agrário de Chimoio, iha Mosambique no konklui estudu universitáriu iha área Relasaun Internasionais no Diplomasia iha Mosambique.

Iha parte seluk, Isilio Coelho, iha esperensia serbisu hanesan hosi tinan 2003-2007 hetan kargu nu’udar Konselleru ba Embaixada Timor-Leste iha Lisboa. Tinan 2011, nu’udar Embaixadór Timor-Leste ba Japaun. No, dadaun ne’e asume kargu nu’udar Diretór Jerál ba Asuntus Bilaterais iha Ministériu Negosiu Estranjeiru e Kooperasaun.

Isilio ho lisensiadu iha Relasaun Internasional no Siénsia Polítika iha Universidade Nova de Lisboa, Portugal no remata grau Mestre iha Seguransa Internasional e Governasaun Global iha Universidade de Londres, Reinu Unidu.

Nune’e mós, Lisualdo Gaspar, dezde tinan 2005-2008 hetan knár nu’udar Segundu-Sekretáriu iha Embaixada Timor-Leste iha Camberra. Entre 2011 no 2015 hala’o funsaun nu’udar Chefe de Delegasaun Timor-Leste iha negosiasaun ho Indonézia kona-ba fronteira trestre. Molok ne’e, hala’o knaar nu’udar Diretór ba Sudeste Asiátiku e Oceánia.

Nia ho nivél edukasaun lisensiadu iha Agropekuariu iha Universidade Nasional Timor-Lorosa’e. Hasai kursu Mestradu iha Administrasaun Públika iha Australian National University (ANU).

Dilplomata Olimpio Branco, Isilio Coelho no Lisualdo Gaspar, nu’udar funsionáriu Ministériu Negósiu Estranjeiru ho tinan naruk iha karreira diplomasia. (Editor, Lariwa).

Pin It

Follow us on Twitter

Sign up via our free email subscription service to receive notifications when new information is available.