Díli-SMI, Porta-voz Movimentu Kontra Okupasaun Tasi Timor – MKOTT, Tomas “Ato” Freitas, husu Governu Australia atu absolve kazu Bernard Collaery no Witness K ne’ebé dadaun ne’e hetan presekusaun hosi tribunal iha Australia.
“Ejize ba Governu Australia para absolve tiha ninia (Bernard Collaery) kazu ho ninia belun Witness K”, dehan Tomas, ba SMI, iha Farol, Segunda, (26/08).
Dadaun ne’e parte MKOTT prepara hela petisaun liuhosi rekoilla asinatura hosi povu Timor-Leste nu’udar jestu solidariedade ba Bernard no Witness ne’ebé luta hasoru justisa iha tribunal Australia nian.
Espetativa hosi MKOTT bele hetan asinatura maizumenus rihun liman (5000) antes loron 30 fulan Agostu hodi nune’e bele entrega ba Governu Australia.
“MKOTT mós halibur hela asinatura atu fó apoiu ba ita nia belun Bernard Collaery hodi tama sai kampu, bairo, públiku nia asinatura. Agora rihun resin ona (1000-resin), espera katak to’o dia 30 Agostu bele halibur to’o rihun lima (5000) asinatura pois aprezenta ba Primeiru Ministru Scott Morrison hosi Australia, sekarik nia mai iha dia 30 Agostu ami hakarak husu Governu Australia absolve nia kazu ne’e”, dehan Ato Freitas.
Porta voz ne’e mós esplika wainhira PM Australia, Scott Morrison, la marka prezensa iha loron selebrasaun tinan 20 konsulta popular mak MKOTT sei buka dala seluk hodi entrega petisaun asinatura liuhosi embasada Australia Timor-Leste nomós liu hosi organizasaun Timor Sea Justice Campaign hodi hato’o ba Parlamentu Australia nian.
Iha parte seluk, Bernard Collaery, rasik deklara liu hosi surat ne’ebé nia haruka ba MKOTT agradese no apresia ba povu Timor-Leste nia solidariedade hodi luta hasoru prosekusaun hosi Governu Australia.
“Ba hau nia kolega sira iha Movimentu Kontra Okupasaun Tasi Timor – MKOTT. Hau apresia tebes ba apoiu povu Timor-Leste hodi luta ba justisa. Hau sei kontinua ajuda maske hau ho kolega Witness presekusaun hosi tribunal”, dehan Collaery, liuhosi surat ne’ebé manda ba MKOTT foin lalais ne’e.
Bernard Collaery nu’udar advogadu ba Witness K ne’ebé fó informasaun kona-ba spionazen Australia hodi tau kamera iha palasiu Governu no deskobre iha tinan 2013.
Nune’e mós, Bernard Collaery, antes ne’e sai mós advogadu ba eis Primeiru Ministru, Kay Rala Xanana Gusmão, wainhira hetan kaputrasaun hosi militar Indonéziu iha tinan 1991. (Editor, Lariwa).