Díli-SMI, Membru Parlamentu Nasional - PN hosi Bloku Aliansa Mudansa ba Progresu – AMP kontinua hatudu hahalok vota kontra ba pedidu Prezidente-da-Repúblika, Francisco Guterres ”Lú Olo” hodi hala’o vizita ofisiál ba nasaun Japaun no Indonéziu.
Membru deputadu hosi bloku AMP kansela viajen PR Lú Olo liu hosi votasaun iha plenaria PN ohin segunda-feira, (30/09) ho votu a-favor 29, kontra 31 no abstensaun 0.
Prezidente Parlamentu Nasional, Arão Noe Amaral, hateten, PN la autoriza dezlokasaun PR Lú Olo ba Japaun no Indonéziu tanba rezultadu plenaria la aprova pedidu viajen Xefe-de-Estadu nian.
“Rezultadu plenaria la aprova viajen Prezidente Repúblika ba Indonéziu no Japaun tanba ne’e Parlamentu Nasional la autoriza dezlokasaun Prezidente Repúblika nian”, dehan Arão Noe, hafoin remata plenaria ba jornalista sira iha PN, Segunda, (30/09).
Deputadu AMP hosi Partidu Libertasaun Popular – PLP, Francisco Vasconselhos, esplika, razaun membru deputadu hosi bloku AMP vota kontra pedidu viajen PR ba estranjeiru tanba seidauk fó toma-pose ba membru Governu na’in 9 to’o ohin loron.
“PR ba partisipa tomada pose Jokowi ho seremonia liurai imperador Japaun nian. Se ita partisipa ema seluk nia tomada pose, (maibe) internalmente ita-nian la fó tomada pose ba malu ne’e oinsa?”, dehan deputadu AMP ne’e.
Relasiona ho vota kontra viajen PR ne’e, deputadu opozisaun hosi Partidu FRETILIN, Antonino Bianco, konsidera deputadu AMP vota ho sentimentu odiu vigansa, la’os ba interese nasional.
“Labele buka de’it inimigu ho Prezidente Repúblika durante ne’e. Ne’e sentimentu odiu vigansa permanente. Xefe Estadu la’os tuur hakarak ba, maibe ba bázea ba konvite”, dehan deputadu ne’e.
Iha parte seluk, deputadu hosi partidu Demokrátiku – PD, hateten, aktu vota kontra hosi membru deputadu AMP hasoru viajen PR hamutuk dala lima tui-tuir malu ne’e hatudu sinál problema boot iha rai-laran.
“Ita bele fó komentariu maibe la konvense malu ona tanba deputadu AMP sira vota kontra viajen Prezidente Repúblika hamutuk dala lima tui-tuir malu”, dehan nian.
Antes ne’e, Laureadu Nobel da Paz, José Ramos Horta, husu ba parlamentu nasional atu fó autorizasaun viajen PR ba nasaun Japaun no Indonéziu. (Editor, Aquino).