04
Sat, Apr
1 New Articles

Ohin, PN Kontinua Fila Fali Debate OJE 2020

Edifisiu Parlamentu Nasional,. Foto, Arkiva SMI.

Flash News
Typography

Díli-SMI: Governu Aliansa Maioria ba Progresu – AMP, ohin, Kuarta-feira (15/01) lori hikas fila fali proposta Orsamentu Jerál Estadu – OJE 2020 ba Parlamentu Nasional – PN hodi diskute hafoin Primeiru Ministru - PM, Taur Matan Ruak, deside retira iha loron 3 fulan Dezembru 2019.

Iha pajina ofisiál gabinete PM nian tau ona ajenda re-debate OJE 2020 hahú tuku 09:00 OTL nian.

Proposta OJE 2020 hahú ona diskute iha PN fulan Dezembru 2019 maibe Governu retira relasiona ho preokupasaun deputadu no deputada sira hosi bankada opozisaun nomos Governu ne’ebé konsidera kontra lei jestaun finanseiru nian.

“Governu aseita retira OJE 2020 hodi halo reformulasaun. Deputadu opozisaun no bankada apoiu governu kestiona hotu katak governu halo proposta orsamentu la estruturadu no kontra lei jestaun finanseiru nian,” dehan, Taur Matan Ruak, hafoin remata halo aprezentasaun OJE loron daruak, Tersa-feira, (03/12) iha PN, tempu ne’eba.

Hafoin retira OJE 2020, Governu promete atu lori hikas fali ba PN iha loron 13 fulan Dezembru 2019 maibe parte Governu hakerek fali karta ba PN husu aumenta tempu atu nune'e bele halo harmonizasaun OJE ho didiak.

Iha parte seluk, Konsellu Ministru liuhosi reuniaun extra-ordinária iha Segunda-feira, (13/01), orseik aprova ona orsamentu duodesimál ba fulan Janeiru nian ho montante dollar Amerikanu millaun 166.4 hodi sustenta makina Estadu nian relasiona ho diskusaun OJE 2020 ne’ebé seidauk remata.

Governu aprova orsamentu duodesimál ne’e bázea ba Lei n.13/2009, ne’ebé altera hosi lei n.9/2011 no n.3/2013 ne’ebé fó dalan atu aplika rejime duodesimál hodi garante operasional makina Estadu nian.

Diploma ida-ne’e hahú vale iha loron 1 fulan-janeiru tinan 2020 no automatikamente sei la vale tan wainhira lei OJE 2020 aprova ona. (Editor, Aquino Soares).

Pin It

Follow us on Twitter

Sign up via our free email subscription service to receive notifications when new information is available.