OJE 2020 Maioria Foti Hosi Fundu Petrolíferu

Díli-SMI: Proposta Orsamentu Jerál Estadu 2020 ho montante billaun $.1,668 dollar Amerikanu ne’ebé VIII Governu konstitusional propoin hodi re-debate fila fali ohin (15/01) iha Parlamentu Nasional – PN maioria mai hosi fundu petrolíferu nian.

Totál orsamentu billaun $. 1,688 ne’e mai hosi tranferénsia fundu petrolífera hamutuk millaun $999,5, reseita naun-petrolífera hamutuk millaun $336,8, fundu doasaun hamutuk millaun $7,5, fundu empréstimu hamutuk millaun $73, saldu RAEOA-ZEEMS hamutuk millaun $.126,3,  no orsan hosi konta tezoru hamutuk millaun $254,3.

Primeiru Ministru, Taur Matan Ruak, liuhosi diskursu iha iha debate jeneralidade, OJE 2020 ne’ebé VIII Governu aprezenta atu finansia programa lima (5) ba tinan fiskal 2020 ne’ebé identifikadu nu’udar perioridade.

“Perioridade Governu ba 2020 liuhosi OJE atu finansia programa VIII Governu Konstitusional iha tinan fiskal 2020, iha seitor 5 mak define ona nu’udar perioridade prinsipál”, dehan, Primeiru Ministru, Taur Matan Ruak.

Setór perioridade lima ne’e mak hanesan kapitál sosiál, dezenvolvimentu ekonómiku, mellora konktividade nasional, konsolidasaun no hametin seguransa no relasaun esterna, hametin justisa, demokrásia no diretu umanu nian.

Xefe Governu ne’e reforsa katak liuhosi OJE 2020 Governu bele ezekuta ninia polítika dezenvolvimentu ne’ebé define ona iha Planu Estratéjiku Dezenvolimentu Nasional – PEDN. Ho objetivu atu bele halo Timor-Leste sai nu’udar nasaun ne’ebé ho rendementu médiu iha tinan 2030.

Maizumenus %28,4 hosi proposta OJE 2020 sei aloka ba ministériu no instituisaun hodi dezenvolve seitor kapitál sosiál, ne’ebé ho distribuisaun %9,5 ba dezenvolimentu area edukasaun, %13 ba asuntu protesaun sosiál no ba area saude ho %7,3.

Tuir proposta OJE 2020 anterior hamutuk billaun $1,950 no Governu muda ba billaun $.1, 668 ne’ebé konsege redús millaun $228. (Editor, Edy Silva).