Díli-SMI: Prezidente Conselho de Imprensa – CI, Virgílio da Silva Guterres, konsidera jornalista no entrevistadór mídia GMN, Expedito Dias Ximenes, fó sai informasaun hoax ba públiku durante hala’o entrevista ho Prezdente partidu CNRT, Kayrala Xanana Gusmão, iha programa grande entrevista GMN foin lalais ne’e tanba la uza produtu jornalístiku ne’ebé kredivel maibe uza fonte la klaru sai referénsia ba programa refere.
“CI haree katak entrevistadór Programa Grande Entrevista la uza produtu jornalístiku ida-ne’ebé kredivel sai nu’udar referénsia, maibé uza fali notisia ne’ebé ninia fonte la klaru no konsidera nu’udar fake news no hoax sai referénsia ba programa ne’e”, dehan Prezidente CI, liuhosi konferénsia Imprensa, Tersa, (18/02), iha Kintal-Boot-Díli.
Prezidente CI ne’e reforsa, bazeia ba rezultadu monitorizasaun no verifikasaun katak jornalista Expedito viola prinsipiu jornalizmu nian hodi hamosu narrasaun ho pergunta ne’ebé la bazeia ba faktu tanba ho referénsia hosi fonte anónimu hodi uza ba durante halo entrevista ho líder karismatiku Kayrala Xanana Gusmão.
“Entrevistadór Expedito Dias Ximenes la la’o-tuir prinsípiu jornalizmu nian tamba hamosu narrasaun ho pergunta ne’ebé la bazeia faktu. Narrasaun ne’e la bazeia ba faktu tamba entrevistadór Expedito foti informasaun husi mídia sosiál nu’udar referénsia ba nia iha programa ne’e ho fonte anónimu ne’ebé nia verasidade kestionavél.
Narasaun ne’ebé entrevistadór hato’o mak, “Maun-boot foin fila husi rai-liur, iha jornál balu publika katak Priméru Ministru mak lakohi Prezidente Repúblika fó tomada de pose, la’os prezidente repúblika mak lakohi fó pose. Narrasaun ida ne’ebé ikus mai hamosu polímika iha sosiadade nia leet.
Narrasaun ho pergunta ne’ebé entrevistadór hato’o ne’e halo ho intensaun atu forma opiniaun públiku foun iha situasaun polítika dadauk ne’e. Liga ho ida-nee, CI konsidera Redasaun GMN viola Kódigu Étika Pontu 1 no Pontu 2 tamba la tranzmite informasaun loloos bazeia ba referénsia ida-ne’ebé loos.
Tuir eis Prezidente AJTL ne’e katak redasaun GMN TV iha obrigasaun étika atu la’o tuir prinsípiu jornalizmu paz nian (peace journalism) atu evita konflitu entre lider nasionál sira, ne’ebé bele dirije ba instabilidade polítika no seguransa iha nasaun ida-ne’e.
Eis prizioneiru ne’e mos husu ba Redasaun GMN atu uza referénsia sira ne’ebé kredivel, liuliu uza fonte notisia sira ne’ebé ninia ezisténsia públiku bele asesu no fiar, nune’e informasaun sira ne’ebé tranzmite labele mislead.
Nia hatutan, jornalista ka instituisaun mídia atu defende no tane-aas prinsipiu jornalizmu hodi nune’e labele hamosu hoax ka hasain inofrmasaun falsu ba publiku.
“Redasaun GMN nian atu tane-aas prinsipiu jornalizm paz (peace journalism) iha ninia publikasaun atuhodi promove paz no estabilidade iha railaran, la’os atu soran fali lider nasionál sira”, katak nia.
Parte seluk, Prezidente CI mós sujere ba futuru GMN labele kontinua ho prátika hasai informasaun la-loos hodi nune’e labele prejudika kanál mídia sira iha rai-laran.
“Husu Redasaun GMN atu hato’o faktu ho loloos iha ninia publikasaun, pur ezemplu tenke espesifikamente temi mídia ne’ebé mak públika notisia no ho data ediasaun nian, nune’e labele prejudika kanál mídia sira seluk”, tenik nia.
Atu remata konferénsia imprensa, kontinua husu ba redasaun GMN, atu kaer metin nafatin Kódigu Étika Jornalístika no prinsipiu universál jornalístika, tanba ida-ne’e nu’udar dalan di’ak-liu, atu ajuda hasees GMN husi risku legál iha futuru. (Editor, Guido).