Díli-SMI: VIII Governu ne’ebé lídera hosi Primeiru Ministru, Taur Matan Ruak, deside reativa fali atividade treinamentu Grupu Arte Marsial – GAM hanesan KORK, PSHT no Kera Sakti ne’ebé durante ne’ebé bandu labele halo atividade GAM nian.
Autorizasaun ne’e liuhosi reuniaun Konsellu Ministru – KM , Kuarta-feira ohin, (19/02) iha Palasiu Governu hodi aprova proposta revolgasaun Governu AMP anterior ho númeru. 16/2013, loron 10 fulan-Jullu hodi bandu PSHT, KORK, Kera Sakti atu labele halo atividade GAM iha rai-laran.
Ministru Reforma Lejizlativa no Asuntu Parlamentar, Fidelis Mangalhães, hatete, hosi diploma legál ne’ebé KM aprova fó orden ba instituisaun seguransa atu bele halo kontrolu masimu ba movimentu GAM iha rai-laran.
“Diploma ne'e rasik instrui mós Polísia Nasionál Timor-Leste atu inténsifika asaun kombate krime sira kona-ba prátika ilísitu hosi arte marsiais no rituais sira”, dehan Fidelis, iha Palásiu Governu, Kuarta, (19/02) hafoin remata enkontru KM nian.
Maske KM deside ona reativa atividade GAM maibe Governante hosi Partidu Libertasaun Popular – PLP ne’e esplika katak prátika atividade GAM tenke la’o tuir lei nú 5 kona-ba Arma Branka no Arte Marsial nian
“Rezolusaun ne’e dehan Arte Marsial bele prátika maibé tenke ho lei númeru 5 kona-ba arma branka no arte marsial”, dehan Fidelis.
Antes ne'e, Prezidente Repúblika, Francisco Guterres “Lú Olo” ho no Xefe Estadu Maior Jenerál F-FDTL, Lere Anan Timur, sujere ba Governu atu re-ativa fali atividade GAM ho legalmente atu nune’e hafasil instituisaun seguransa hodi halo kontrolu wainhira hala’o atividade treinamentu GAM nian.
Iha loron 12 fulan Jullu 2013, Governu liuhosi desizaun estra-ordináriu hodi hasain rezolusaun númeru 16/2013 hodi bandu totalmente PSHT, KORK no Kera Sakti hodi kontinua halo atividade GAM. (Editor, Guido).