Díli-SMI: Ministériu Públiku – MP sei halo prosesu investigasaun ba projetu ilegál hamutuk 45 hosi totál projetu 142 dadaun ne’e rejista ona iha Tribunal tanba projetu hirak ne’e identifikadu laiha kontratu.
“Projetu 142, ami selu ona 97 projetu ne’ebé mak iha kontratu maibé bazeia ba prestasaun servisu iha tereñu, oinsá instalasaun fíziku no faktura ne’ebé sira hatama ita halo pagamentu. Agora 45 seidauk iha ne’e ita-boot sira tuir hela katak sei iha prosesu Tribunál, prokuradoria sira, sira halo hela investigasaun ba sira ne’ebé mak kontratu laiha”, dehan Ministru Obras Públikas – MOP, Salvador Pires, iha Comoro, Segunda, (24/02).
Maske nune’e, Governante ne’e esplika wainhira rezultadu hosi investigasaun ne’e konklui no Tribunal rekomenda atu halo pagamentu mak otomatikamente Governu foun mai presiza selu projetu hirak ne’e.
“See Tribunál haruka selu ha’u hanoin Governu dasia sei realiza”, dehan Salvador.
Durante ne’e VIII Governu liuhosi MOP halo ona pagamentu ba projetu hamutuk 97 ne’ebé identifika iha kontratu nomós realizasaun serbisu iha tereñu inklui kompañia hirak ne’e hatama ona faktura ba Governu.
Tuir prosedementu normal Governu atu selu tékniku Obras Públikas no Ajénsia Dezenvolvimentu Nasionál - ADN hala’o uluk verifikasaun ba realizasaun fíziku projetu nian iha tereñu, antes ministériu halo aprovasaun ba pagamentu.
Hosi totál projetu hamutuk 142, Governu aloka orsamentu selu projetu hamutuk millaun $200 resin no dadaun ne’e ezekuta ona millaun $.105 resin hodi selu ba projetu hamutuk 97 ne’ebé hetan ona avaliasaun hosi ADN.
Projetu hamutuk 142 refere durante ne’e sai polímika iha sosiadade nia leet nomós sai preokupasaun ba partidu opozisaun iha Parlamentu Nasional – PN. (Editór, Guido Santos).
