Díli-SMI: Veteranu Reis Kadalak hetan asaltu hosi ema deskuiñesidu iha area Bairro-pite, Díli, Segunda, (02/03), maizumenus tuku 10 dadersan ne’ebé rezulta vitima kanek no ran-sulin iha rein-toos.
Relasiona ho akontesementu ne’e parte Polisia Nasional Timor-Leste – PNTL dadaun ne’e halo hela prosesu investigasaun hodi buka tuir autor ne’ebé baku veteranu refere.
Fotográfu veteranu Reis Kadalak ne’ebé postin hosi sovervivente 12 Novembru no atúal membru PNTL, Alex da Costa, hetan reazen maka’as hosi komentator no husu polisia atu kaptura lalais autor baku veteranu ne’e.
Hosi komentator sira seluk husu ba Konsellu Veteranu ba futuru atu produz lei hodi asegura ba luta-na’in sira ne’ebé fó an ba ukun-an ida-ne’e.
Ohin, maioria veteranu iha Timor-Leste hala’o atividade seminariu iha CCD nu’udar parte hosi atividade atu komemora loron Veteranu ne’ebés sei monu aban iha loron 3 Marsu 2020.
To’o notisia ne’e hatun parte SMI seidauk halo konfirmasaun ho parte vitima no polisia hodi konfirma kona-ba motivu hosi asalta ne’e. (Editór, Guido Santos).