Díli-SMI: Reprezentante povu iha uma fukun Parlamentu Nasional - PN kondena maka’as atetude oknum ne’ebé asalta veteranu Reis Kadalak no alerta ba Polisia Nasional Timor-Leste – PNTL atu halo kaptura lalais autor refere hodi submete ba prosesu investigasaun.
“Husu ba instituisaun PNTL ho instituisaun relevantes sira, atu esforsu an hodi buka tuir autór ne’ebé baku veteranus Reis Kadalak hodi submete ba prosesu investigasaun ho masimu”, dehan Prezidente PN, Arão Noe de Jesus, ba jornalista sira hafoin remata plenaria, Segunda, (02/03).
Prezidente PN konsidera aktu oknum ne’ebé baku veteranu Reis Kadalak hanesan des-respeitu dignidade nasaun Repúblika Demokrátika Timor-Leste – RDTL no lakohi kontribui ba estabilidade nasional.
Veteranu Reis Kadalak rasik hetan asaltu hosi ema deskuiñesidu iha area Bairro-pite, Díli, Segunda, (02/03), msizumenus tuku 10 dadersan ne’ebé rezulta vitima kanek no ran-sulin iha rein-toos.
Relasiona ho akontesementu ne’e parte Polisia Nasional Timor-Leste – PNTL dadaun ne’e halo hela prosesu investigasaun hodi buka tuir autor ne’ebé baku veteranu refere.
Fotográfu veteranu Reis Kadalak ne’ebé posting hosi sovervivente 12 Novembru no atúal membru PNTL, Alex da Costa, hetan reazen maka’as hosi komentator no husu polisia atu kaptura lalais autor baku veteranu ne’e.
Hosi komentator sira seluk husu ba Konsellu Veteranu ba futuru atu produz lei hodi asegura ba luta-na’in sira ne’ebé fó an ba ukun-an ida-ne’e.
Ohin, maioria veteranu iha Timor-Leste hala’o atividade seminariu iha CCD nu’udar parte hosi atividade atu komemora loron Veteranu ne’ebé sei monu aban iha loron 3 Marsu 2020.
To’o notisia ne’e hatun parte SMI seidauk halo konfirmasaun ho parte vítima no polísia hodi konfirma kona-ba motivu hosi asalta ne’e. (Editór, Rui Santos).
