Díli-SMI: Desizaun Governu ne’ebé indika Suku Tibar hanesan fatin ba izolamentu suspeitu moras virus coronohetan kritika hosi Parlamentu Nasional – PN tanba laiha konsultasaun ho autoridade no komunidade antes foti desizaun.
Prezidente Komisaun F PN ne’ebé trata ba asuntu Saúde, Seguransa no Igualdade Jéneru, Maria Barreto, konsidera desizaun Governu ne’e estrañu tanba seidauk konsulta ho autoridade lokál no komunidade maibe deside ho unilateralmente.
"Governu tenke esforsu masimu hodi halo kordenasaun diak entre lideransa autoridade lokál no komunidade sira, hodi esplika ho klaru kona-ba moras virus corona, atu nune ita nia lideransa autoridade lokál ho komunidade hodi komprende konaba moras virus corona", dehan deputada ne’e, ba SMI iha PN, Segunda-feira, (09/03).
Deputada hosi bankada CNRT ne’e esplika wainhira Governu la uza mekanizmu aprosimasaun ho diak mak susar tebes atu hetan solusaun ba fatin izolamentu suspeitu virus corona ne’e.
“Wainhira Governu kontinua uza nia poder tomak hodi obriga ita nia lideransa autoridade lokál ho komunidade sira, hodi oferese fatin ba Governu, sei la hetan solusaun ne’ebé adekuadu hodi rezolve ba fatin izolamentu hosi moras virus corona.
Maske nune’e, Governu liu hosi Primeiru Ministru – PM, Taur Matan Ruak, fó ona orientasaun ba parte ministériu kompetente sira atu halo liña kordenasaun hodi halo atendementu ba sidadaun Italianu ne’ebé suspeita ona virus corona. No, dadaun ne’e hetan izolamentu iha Community House Limited Tibar.
Liga ho fatin izolamentu suspeitu virus corona ne’ebé dadaun sai polímika, Diretora Jerál Prestasaun Saúde, Ministériu Saúde, Odete Viegas da Silva, esplika, Governu seidauk bele transfere sidadaun Italianu ba fatin izolamentu Tibar tanba hetan impedementu hosi komunidade sira.
Maibe sei lori pasiente virus corona ne’e ba fatin izolamentu Tibar wainhira hetan ona konsensu entre Governu no komunidade iha area refere.
Odete klarifika katak sidadaun Italianu refere sei kontinua hetan izolamentu iha klínika STAMFORD MEDICAL Lda, Mandarin – Díli.
Parte komunidade suku Tibar rasik foin lalais ne’e hala’o asaun pasifiku hodi protesta dezisaun Governu atu izola pasiente virus corona iha Community House Limited Tibar nian. (Editór, Rui Santos).