Díli-SMI: Wainhira reprezentante povu iha Parlamentu Nasional – PN kontinua nonok hodi la kria lalais lei cyber crime nian atu regula kona-ba uza mídia sosiál liu-liu ema sira ne’ebé kria ID falsu iha facebook hodi insulta no tolok ema no líder sira, milítar sei foti medida rasik hasoru ema hirak ne’e hodi prosesa tuir justisa iha rai-laran.
Komandante Jerál Falintil Forsa Defeza Timor-Leste – F-FDTL, Maijor Jenerál, Lere Anan Timur, esplika, Timor-Leste hanesan nasaun demokrátiku no sidadaun hot-hotu moris livre maibe presiza iha responsabilidade moral hodi respeita ema seluk liu-liu líder nasional sira.
"Sidadaun hotu moris iha demokrásia ne’ebé livre no independente, maibe tenke respeita ba-ita nia lideransa nasional sira, la’os atu uza ID falsu hodi insulta no maltrata ba-ita nia lideransa nasional sira iha mídia sosiál hanesan facebook”, dehan Lere Anan Timur, iha Palasiu Prezidensiál Bairro-Pite, Kurta, (11/03) hafoin hasoru malu ho Xefe-de-Estadu, Francisco Guterres Lú Olo.
Relasiona ho asuntu hirak ne’e, líder masimu instituisaun defeza ne’e alerta ba PN atu aslega lalais lei cyber crime nune’e bele fó sansaun ba pesoal sira ne’ebé kria ID falsu facebook atu uza hodi insulta no ataka ema seluk.
Tuir dadus World Stats hatudu katak nasaun Timor-Leste ne’ebé ho totál populasaun juta ida liu ne’e maizumenus ema hamutuk 410.000 mak ativu uza internete. hosi númeru ne’ebé iha identifika maizumenus ema na’in 390.000 mak uza Facebook lorloron hodi hetan no espalla informasaun ba públiku. (Editór, Guido Soares).