06
Sat, Jun
9 New Articles

Suspeitu COVID-19 iha Same, Tilman Rezeita Deklarasaun PM Taur

Diretóra Serbisu Saúde Manufahi, Florençia Tilman Corte – Reál. Foto, Jugu.

Flash News
Typography

Manufahi-SMI: Diretóra Serbisu Saúde Munisípiu Manufahi, Florençia Tilman Corte – Reál, rezeuta deklarasaun Primeiru Ministru – PM, Taur Matan Ruak, liu-hosi plenária iha Parlamentu Nasional - PN, Kinta-feira, (26/03) katak timoroan ida iha Same indentifikadu sai nu’udar suspeitu ba Virus Corona ka COVID – 19.

“Kona-ba deklarasaun Primeiru Ministru nian iha Plenária Parlamentu Nasionál kinta-feira ohin katak komunidade Manufahi na’in ida suspeitu ba Corona virus ne’e la loos”, dehan Florençia, ba jornalista korespondente SMI iha Same, Manufahi, Kinta, (26/03).

Florençia Tilman, rekuiñese katak tebes duni iha sidadaun timoroan na’in 3 hosi munisípiu Manufahi ne’ebé hetan izolamentu loron 14 hafoin fila hosi Indonézia maibe seidauk deteta nu’udar suspeitu COVID – 19 tanba foin observa loron 3 nia laran.

“Informasaun ne’e laloos, tanba parte saúde rasik to’o oras ne’e hala’o hela karantina ba sidadaun Timor oan na’in tolu hosi Manufahi ne’ebé foin fila husi Indonézia, hodi observa hela durante loron 14 iha fatin izolamentu nian iha Same foin observa loron 3, maibe seidauk detekta hanesan suspeitu ba corona virus, tanba ne’e servisu Saúde munisípiu Manufahi rezeita totalmente informasaun ne’e”, dehan Tilman.

Relasiona ho informasaun ba refere, Diretóra Serbisu Saúde Manufahi ne’e husu ba públiku no komunidade sira iha Munisípiu Manufahi labele pániku ho informasaun ne’ebé dadaun ne’e espalla ona iha mídia sira kona-ba timoroan hosi same sai suspeitu ba COVID – 19 nian.

PM Taur Matan Ruak rasik deklara iha sesaun plenária durante diskusaun Estadu Emerjensia katak sidadaun Same ne’ebé sai suspeitu ba Virus Corona foin fila hosi nasaun viziñu Indonézia nian.

“Ministra Saúde foin aviza katak ita dadaun ne’e iha suspeitu ida iha Same, foin mai hosi sorin (Indonézia)’, dehan TMR.

Maske nune’e, líder masimu VIII Governu Konstitusional ne’e kontinua esforsu atu rezolve problema moras Virus Corona ne’ebé dadaun sai preokupasaun públiku iha Timor-Leste. (Editor, Rui Santos).

Pin It

Follow us on Twitter

Sign up via our free email subscription service to receive notifications when new information is available.