Díli-SMI: Sidadaun timoroan hamutuk ema na’in 14 ne’ebé foin lalais fila mai Timor-Leste no Governu deside halo karantina sira iha otél Novo Horizonte sente la-sastifas ho fornesementu ai-han hosi parte Ministériu Saúde ne’ebé entrega ba kompañia tein tanba konsidera la-ejíne.
Letizia Neves, nu’udar sidadaun timoroan ne’ebé hamutuk ho nia maluk sira hetan karantina iha Otél Novo Horizonte, esplika, fou-foun tama karantina kuaze loron hat hetan fornesementu ai-han ne’ebé organiza hosi parte MS ho kualidade no tuir oras.
Maibe depois parte MS entrega ba kompañia ida ho naran Vermalhosa ne’ebé ikus-mai hetan ka simu ai-han ne’ebé ladun iha ejíne.
“Durante loron 4 ami iha karantina Metiaut Novo Horizonte hosi MS maka fornese hahan mai Menu diak i han tuir oras han nian. Komesa ohin loron Quinta-feira sira informa fali katak MS la-toma konta ona hahan, sira entrega fali ba kompañia “Vermalhosa”ka saída ka. Depois oras matabisu nian tuir horáriu katak 7:30am maibe realidade jam 10:35am foin maka matabisu”, dehan Letizia ho lamentavel ba jornalista SMI, Kinta, (26/03).
Nia mós lamenta ho distribuisau ai-han hosi kompañia ne’ebé tarde tanba laiha kontrolasaun ne’ebé rigrozu hosi parte Ministériu Saúde nian inklui mós menu ne’ebé uza ho ayam-potong.
“Oras han meiudia nian mai 14:00pm. Hosi MS mós demais nein kontrola kompañia ne’ebé agora dadauk toma konta hahan ne’e. Sáhahan ida maka tein nune’e? Saúde dehan labele fó ayam potong? Be agora dadauk ne’e saída maka ne’e?”, dehan nia.
Tuir nia, haree hosi menu ai-han ne’ebé fornese hosi kompañia refere hanesan estraga de’it orsan Estadu ne’ebé parte MS aloka ba fornesementu ai-han ba sidadaun karantina sira.
To’o notisia ne’e públika parte redasaun SMI seidauk halo konfirmasaun ba parte Ministériu Saúde no kompañia ne’ebé fornese ai-han ba sidadaun karantina sira. (Editór, Rui Santos).