06
Sat, Jun
9 New Articles

TMR Sei La Hasai Membru Governu Hosi Partidu CNRT

Primeiru Ministru, Taur Matan Ruak, halo entrevista ho mídia hafoin remata enkontru ho PR. Foto, Mídia PR.

Flash News
Typography

Díli-SMI: Xefe-de-Governu, Taur Matan Ruak, promote sei mantein nafatin membru Governu hosi partidu CNRT ne’ebé durante ne’e hola-parte iha VIII Governu no kontinua kompleta kargu sira ne’ebé sei falta hodi nune’e bele serbi povu no nasaun.

Maske nune’e, TMR, esplika karik membru Governu hosi partidu CNRT mak husu rasik atu sai hosi estrutura VIII Governu mak sei simu sira ninia pedidu ne’e.

“Se rezigna-an, se sira husu ne’e buat seluk. Rezigna-an, ha’u labele halo buat ida. Hasai, ha’u la hasai,” dehan TMR, Kinta, (30/04) hafoin enkontru semanal ho Prezidente-da-Repúblika, Francisco Guterres Lú Olo, iha Palásiu Prezidensial Nicolau Lobato, Bairro-Pite, Dili.

Xefe-de-Governu ne’e katak durante enkontru ho Prezidente-da-Repúblika ko’alia mós asuntu kona-ba toma posse membru Governu foun atu kompleta estrutura VIII Governu ne’ebé sei mamuk.

Nune’e iha tempu besik parte Governu sei haruka lista membru Governu foun ba Xefe-de-Estadu atu bele fó toma-posse.

Eis Prezidente-da-Repúblika ne’e anúnsiu naran membru Governu foun hamutuk ema na’in 6 mak hanesan ba kargu Ministru Antigu Kombatente, Meta Malik, Ministra Saúde,  Odete Maria de Freitas Belo, Ministru Adminsitrasaun no ESTATAL, Faustino Cardoso, Ministru Turizmu, Komersiu no Industria,  Manuel Vong, no, Vise Ministra Turizmu, Komersiu no Industria, Inácia Teixeira.

Hosi kandidatu membru Governu foun na’in 6 ne’e kompostu hosi feto ema na’in 2 no mane ema na’in 4 ne’ebé mai hosi kompozisaun partidu FRETILIN ema na’in 5 no Partidu Demokrátiku ema na’in 1.

PM informa mós, durante enkontru esplika kona-ba Dekretu Governu ba medida sira implementasaun estadu emerjénsia ne’ebé altera regra balun mak hanesan movimentu transporte públiku nian.

Katak, Transporte públiku hanesan mikrolete sira bele hala’o ona operasaun maibe presiza kontinua kumpri regra ne’ebé fó sai hosi Ministériu Transporte no Telekomunikasaun ninian.

Antes remata entrevista, Taur, haforsa, Governu sei esforsu iha fulan Maiu nia laran sei hahú ona pakote umanitariu nian hosi minimiza impaktu sosiál no ekonómia ba povu nia moris. (Editor, Rui Santos).

 

Pin It

Follow us on Twitter

Sign up via our free email subscription service to receive notifications when new information is available.