Díli-SMI: Tuir rezultadu monitorizasaun Sindikatu Profesores Timor-Leste – SPTL katak programa “Eskola Ba Uma” ne’ebé parte Ministériu Edukasaun Joventude no Disportu - MEJD realiza relasiona ho COVID-19 laiha benefisiu ba estudante iha area rural tanba defisil atu asesu ho diak.
Prezidente SPTL, Francisco da Costa Fernandes, argumenta, programa “Eskola Ba Uma” ne’ebé Governu liu-hosi ME halo hodi fasilita estudante sira estuda iha uma durante tempu Estadu Emerjénsia – EE ne’e defikulta estudante sira iha area rural tanba laiha telefone Android.
“Maioria estudante barak mak hela iha area rurál, tanba ne’e estudante sira ne’ebé hela iha area rual la asesu ba Telefone Android. Seidauk asesu ba eletrisidade no estudante sira sei uza nafatin lampariñas hodi estuda iha tempu kalan”, dehan Francisco, iha Salaun NGO FONGTIL, Kaikoli, Tersa, (05/05).
Nune’e mós maioria estudante iha area rural la asesu mídia elektrónika hanesan televizaun hodi fasilita oan sira atu tuir programa “Eskola Ba Uma” ne’ebé fó sai iha televizaun.
Tan-ne’e, Fernandes, husu ba Governu atu kria mekanizmu ne’ebé diak hodi fasilita prosesu aprendizajen ba estudante sira iha area rural ho diak liu-hosi programa “Eskola Ba Uma” ne’e.
“Seidauk asesu ba televizaun, atu hodi estuda matéria ne’ebé MEJD, transforma ona hosi Mídia online kona-ba programa Eskola Ba Uma ne’e”, dehan nia.
Responsavél SPTL relata maizumenus estudante hamutuk rihun Tolu mak espalla iha eskola sira iha teritóriu timor-laran tomak.
Antes ne’e, Ministra Edukasaun Joventude no Disportu – MEJD, Dulce de Jesus Soares, rekuiñese katak estudante sira hosi Pre-Eskolar to’o Tekniku Vokasionál iha area rural maizumenus hamutuk pursentu 30 mak la asesu programa “Eskola Ba Uma” refere.
“Ita konsidera estudante pursentu 30 iha area rural mak seidauk asesu liña internete no kanál RTTL”, dehan Dulce.
Maske nune’e, parte MEJD kontinua halo esforsu hodi buka dalan atu fahe livru ba estudante sira iha area rural sira atu bele fasilita sira nia prosesu aprendizajen durante periodu implementasaun EE relasiona ho asuntu COVID-19 nian. (Editór, Rui Santos).