Díli-SMI: Loron Segunda, (18/05) madrugada maizumenus tuku 4:00 ema deskuiñesidu sunu uma ualu (8) iha area merkadu Taibesi, Aldeia Temporal, Suku Lahane Oriental, Postu Administrativu Na’in Feto, Munisipiu Díli.
Tuir vítima, Armanda Fátima, katak, asidente sunu uma ne’e akontese hosi ema deskuiñesidu hafoin mosu konflitu entre sira tanba hemu tua lanu.
“Hau deskonfia hosi ema deskuiñesidu ne’ebé sunu hau nia uma iha merkadu Taibesi, tanba fiu eletrisidade ne’ebé hau liga ba uma diak hela, laiha konslet”, dehan vitíma Armanda, ba SMI, Segunda, (18/05), iha Taibesi.
Vítima Armanda, haktuir, hosi rezultadu ema deskuiñesidu ne’ebé sunu ninia halakon sasan tomak iha uma laran inklui orsan hamutuk dollar atus lima ne’ebé nia rai-hela iha uma.
“Sasan uma laran la aproveita totál inklui orsan hamutuk dollar atus lima maka ahi-han”, dehan nia.
Vítima ne’e mós husu ba parte seguransa liu-liu Komandu Polísia Nasional Timor Leste – PNTL atu halo seguransa masimu iha area refere. Nune’e, bele minimiza aktu kriminozu sira ne’ebé halo komunidade moris la seguru.
Relasiona ho akontesementu ne’e, parte Xefe Jestaun merkadu Taibesi, Anibal de Jesus, reforsa katak akontesementu ahi-han uma komunidade iha area merkadu Taibesi ne’e sunu hosi ema deskuiñesidu sira.
“Los duni akontesementu kona-ba ahi-han uma iha merkadu taibesi mai hosi ema deskuiñesidu, tanba merkadu taibese sai hanesan fatin ne’ebé risku ba konflitu”, katak nia.
Nune’e, hanesan responsavél ba merkadu Taibesi sei kolabora ho vítima sira, autoridade lokál, parte polísia hodi buka tuir suspeitu sira ne’ebé deskonfia sunu uma komunidade refere. (Editór, Ajito Soares)
