Díli-SMI: Xefe Estadu Maior Jenerál F-FDTL, Lere Anan Timur, husu ba pesoal ka grupu rezistensia no veteran sira labele hasai esteitmentu provokativu sira ne’ebé bele hafahe povu nia kria instabilidade, maibe oinsa ajuda Estadu hodi rezolve impase polítika iha rai-laran.
“Hau husu nafatin, liu-liu, ba ema veteranus sira, rezisténsia nia ema, lalika kaer polítika fahe ema. Ita mak komesa halo buat ne’e, ema seluk bele aproveita”, dehan Lere, hafoin hala’o audénsia semanál ho Prezidente-da-Repúblika, Francisco Guterres “Lú Ólo” iha palasiu prezidensiál, Aitarak-Laran-Díli, Kuarta, (27/05).
Tanba ne’e veteranu sira tenke kuidadu wainhira hola pozisaun ruma liu-hosi hasai esteitementu ba públiku relasiona ho konflitu entre líder nasional iha rai-laran.
“Apela ba maluk rezistensia nia ema, atu kuidadu bainhira ita atu toma pozisaun ruma”, dehan Jeneral fitun rua ne’e.
Lere hatutan, hanesan ema rezistensia no veteranu iha responsabilidade morál hodi ajuda buka solusaun ba problema ne’ebé akontese, la’os atu aumenta kria problema.
Nune’e, eis komandante FALINTIL ne’e, husu ba maluk veteranu sira atu labele hatama kanur-tohar ba problema entre líder sira ne’ebé to’o ohin loron seidauk iha solusaun.
“Ita lalika hatama kanuru tohar ba ita-nia maun sira-nia problema. Ita ajuda rezolve sira-nia problema labele halo todan tan problema ne’e”, tenik nia. (Editór, Ajito Soares).
