Manufahi-SMI: Estadu Emerjénsia ba dala-3 ona maibe parte Governu kontinua hakmatek ho promesa subsídiu $100 inklui atu fahe ai-han ba komunidade, ikus-mai emprezáriu lokál no movimentu solidariedade sira hosi timor-oan mak deside hodi apoiu nesesidade báziku ba komunidade sira.
Asaun solidariedade barak mak pesoál, grupu movimentu sira inklui emprezáriu lokál sira halo durante ne’e liu-hosi fahe nesesidade báziku ba ema vunerável sira iha kapitál Díli inklui munisípiu sira hanesan fahe fós, mina no seluk tan.
Iha semana kotuk (Sabdu, 31/05) emprezáriu lokál, Afonso Hendrique “Mau Kei” hamutuk ho Komisaun Tekniku COVID-19 munisípiu Manufahi fahe nesesidade báziku ba komunidade vunerável hamutuk ema na’in 120 iha postu Administrativu Turiscai.
Prezidente Komisaun Tekniku COVID-19 no atúal Administrador munisípiu Manufahi, Arantes Isac Sarmento, husu agradese ba emprezáriu Manufahi oan “Mau Kei” ne’ebé ho laran luak hodi tulun feto-faluk, oan-kiak no difisiente sira hamutuk ema na’in 120 iha Turiscai.
“Agradese, ba imprezáriu Manufahi oan Hendrique Mau-Kei ne'ebè hatudu ona solidariadade ba povu Manufahi hodi f’o kontribuisaun sasan nesesidade bázika, liu-hosi Komisaun Tekniku COVID-19 hanesan fós saka 120 ho mina litru 250 hamutuk masa 120, hodi tulun komunidade vulnirável sira na'in 120 iha postu Turiscai”, dehan Arantes, iha Turiscai foin lalais ne’e.
Administradór Manufahi ne’e promote parte ekipa COVID-19 sei nafatin halo esforsu an hodi buka emprezáriu Manufahi oan seluk atu nune’e bele apoiu ema vunerável sira hosi postu Administrativu seluk.
“Parte ekipa COVID-19 sei nafatin buka apoio husi loza no imprezáriu sira iha Manufahi atu kontinua tulun komunidade vulnirável sira seluk iha postu Administrativu Alas no Fatuberliu”, dehan nia.
Tuir observasaun SMI durante halo distribuisaun nesesidade báziku ba ema vunerável sira parte ekia COVID-19 mós distribui brosura no sasan seluk kona-ba prevensaun virus corona ba komunidade. (Editór, Guido Soares).
