Díli-SMI: Primeiru Ministru, Taur Matan Ruak, orienta ona Ministru Agrikultura no Peska – MAP foun, Pedro dos Reis, atu uza tempu tomak durante mandatu atu konsentra iha asuntu hasa’e produsaun agrikula hodi responde ba hamlaha iha rai-laran.
“Iha sesta liu-ba depois de ami simu tomada-de-posse Primeiru ministru oreinta direta katak MAP tenke hasa’e produsaun. Tanba saida mak ho kazu surtu 19 populasaun halerik ba aihan ne’e ita nia kulpa ne’e duni ba oin tenke servisu maka’as iha area agrikultura”, dehan Ministru, Pedro dos Reis, iha Salaun MAP, Comoro, Segunda, (01/06) nu’udar loron primeiru hala’o knár hafoin simu pose hosi Prezidente-da-Repúblika.
Iha okaziaun ne’e, Pedro dos Reis, esplika, MAP hanesan ministériu tékniku mak presiza halo esforsu hodi rezolve problema povu Timor-Leste ne’ebé kontinua hamlaha liu-liu iha situasaun COVID-19 nian.
“Ita labele koa’lia barak tanba ba oin di’ak liu ita haree programa sira ne’ebé mak balun la’o ona no balun seidauk la’o tanba saida, tanba ita ministériu tékniku ita tenke esforsu an tanba povu halerik ba aihan ne’e-duni agora ita tenkieservisu hamutuk atu ba oin”, tenik nia.
Nia reforsa, durante ninia mandate sei halo esforsu an hodi hetan orsan para bele fasilita produsaun ai-han barak ba povu iha rai-laran.
Maibe, nia kontinua komenta, rezultadu sira ne’e bele akontese wainhira serbisu hamutuk entre ne’ebé solídu hahu hosi funsionáriu babain to’o kargu superior sira.
“Ita sei luta atu bele hetan ne’ebé osan boot hodi bele produz ai-han ne’e-duni ita presiza halo mak linã koordenasaun ne’ebé mak diak no tenki servisu hamutuk”, katak nia.
Governante ne’e mós agradese ba MAP sesante Joaquim José Gusmão Dos Reis Martins, ne’ebé durante ninia mandatu ho de’it orsamentu duo-desimu maibe konsege halo atividade importante sira hanesan Sensu Agrikula maske ho hetan dezafiun barak.
Iha oportunidade hanesan, MAP Sesante, Joaquim José Gusmão Dos Reis Martins, apela ba funsionáriu sira atu fó apoiu tomak ba ministru foun liu-hosi dalan sebisu ho profísional.
“Husu ba kargu xefia profísional sira katak Ministériu bele iha palnu estratéjiku ne’ebé oin-oin hodi halo transformasaun agrikultura iha ita- nia rain maibé polítika no planu de’it seidauk to’o. Ita boot sira tenki fó apoiu tomak nu’udar ema profísional hamutuk ho ministru foun atu bele implementa planu ne’ebé mak ita iha tiha ona”, dehan Joaquim.
Parte ketak, Sekretariu Jerál MAP, César Jos’e da Cruz, argumenta, ho prezensa MAP foun sei halo diskusaun hodi tau perioridade ba agrikultura iha area Floresta, Peska, Pekuaria no Veternaria inklui Horti kultura no seluk tan. (Editór, Rui Soares).
