Díli-SMI: Ministru Administrasaun Estatal – MAE, Miguel Pereira de Carvalho, hatete, serbisu importante ida ne’ebé sei hala’o durante mandatu mak konsentra atu fó asisténsia téknika ba administrador sira hodi nune’e bele garante kualidade serbi ba povu no Estadu.
“MAE nia kna'ar mak atu fó asistensia tékniku bá Administradores Munisipiu sira atu bele hala'o sira nia kna'ar bele la'o ho diak”, dehan Miguel Pereira de Carvalho, wainhira hala’o reuniaun loron dahuluk ho pesoál xave sira ne’ebé kaer kargu sira, iha Salaun MAE foin lalais ne’e.
Durante reuniaun ne’e, MAE, Carvalho, bolu atensaun ba kargu xefia sira atu fó ninia seriedade ba serbisu ne’ebé atu hala’o ba ohin hodi nune’e bele atinji meta sira hosi polítika MAE nian.
“Husu bá kargu xefia sira atu funsiona kna'ar ida-idak nian hodi fokus bá servisu sira ne'ebé mak presiza atu kondus bá oin”, tenik nia.
Governante foun ne’e mós husu ba kargu xefia no funsionariu MAE atu serbisu kumpri Lei no regra báziku sira kona-ba funsaun públiku nian.
Nune’e mós, nia aumenta, hahu hosi funsionariu babain to’o iha nivél kargu xefia sira presiza kria ambiente komunikasaun ne’ebé saudavel atu nune’e bele hala’o serbisu ho diak.
“Husu mos bá kargu Xefia sira atu kria komunikasaun diak hosi nivél kraik to'o bá leten nune'e ita bele halo servisu sira la'o ho diak”, katak nia.
MAE mós fó hanoin ba funsionariu tomak atu kontinua tuir regra hosi Ministériu Saúde kona-ba utilizasaun mascara no distansia sosiál durante Estadu Emerjénsia wainhira tama serbisu. (Editór, Guido Soares).