Díli-SMI: Xefe Estadu Maior Jenerál FALINTIL-Forsa Defeza Timor-Leste – F-FDTL, Majór Jenerál Lere Anan Timur, hatete, postu militár foun sira ne’ebé kolokadu ona iha liña fronteira hetan problema lojistiku hanesan transporte, ai-han no alojamentu sira.
“Postu militár foun iha fronteira presiza apoiu lojistiku hanesan transporte, hahan no alojamentu hodi fasilita membru F-FDTL”, dehan, Majór Jenerál Lere ba Prezidente-da-Repúblika, Francisco Guterres “Lú Ólo” iha Palasiu Prezidensiál Bairru pite, Kuarta, (3/06).
Tuir Lere, katak, presiza kria kondisaun diak iha postu militár sira liu-hosi apoiu lojistiku ne’ebé sufisiente hodi nune’e bele ajuda membru F-FDTL sira halo seguransa ho kualidade ba prevensaun krime organizadu no kombate COVID-19.
“Kria kondisaun di’ak iha postu militár sira sei hametin liu-tán kna’ar F-FDTL hametin defeza esterna no apoiu seguransa ba PNTL iha prevensaun no kombate moras corona virus”, dehan eis komandante FALINTIL ne’e.
Jenerál fitun rua ne’e nia esperansa katak ho situasaun rai-laran ne’ebé liu ona faze impase polítika ne’ebé Governu bele rezolve ralais problema militár kolokadu iha liña fronteira.
Ho nune’e, bele fasilita serbisu membru militár nian hodi asegura fronteira terestre ne’ebé durante sai fatin ne’ebé frajil ba movimentu ilegál relasiona ho asuntu COVID-19 nian.
“Timor-Leste ne’ebé taka nia fronteira nu’udar medidas preventiva hasoru COVID-19 obriga sidadaun sira tama no sai ilegalmente, ne’ebé bele hada’et moras corona virus mai Timor-Leste”, katak Lere.
Atu apoiu serbisu militár nian, nia hatutan, komunidade sira presiza kopera ho instituisaun defeza no siguransa liu-hosi fó informasaun kona-ba sidadaun hirak ne’ebé tama sai ilegál hodi tuir medida sira prevensaun COVID-19 nian.
Tuir observasaun SMI hatudu katak postu militár ne’ebé durante ne’e koloka ona iha liña fronteira trestre nian mak hanesan fronteira Tunubibi, Tilomar, Manduki, Atauro no Oecuse. (Editór, Guido Soares).
