Díli-SMI: Primeiru Ministru – PM, Taur Matan Ruak, sujere ba Prezidente-da-Repúblika, Francisco Guterres “Lú Ólo” atu fó autorizasaun ba eis Ministru Planu no Finansa, Rui Gomes, hodi lidera ekipa ba planu rekoperasaun ekonómika relasiona ho impaktu hosi COVID-19 no dezastre naturais durante ne’e.
“Hato’o pedidu ba Prezidente Repúblika atu autoriza ninian asesór ekonómiku, Rui Gomes hodi lidera Ekipa Planu Rekuperasaun Ekonomiku. Planu Rekuperasaun Ekonómiku atu dudu dezenvolvimentu Timor-Leste ba oin ho buras liután hafoin impaktu husi COVID-19 no udan boot no mota sa’e ne’ebé afeta tebes populasaun nia moris”, dehan TMR, iha Palasiu Prezidensiál, Bairu-pite, Kinta, (04/06).
PM Taur mós informa ba Xefe-de-Estadu kona-ba distribuisaun apoiu subsídiu $100 ba uma-kain sira iha teritóriu laran relasiona impaktu hosi desizaun implementasaun Estadu Emerjénsia – EE hodi prevene COVID-19.
Parte Governu liu-liu ministériu relevante sira halo ona preparasun finál hodi hein prosesu lansamentu apoiu subsídiu $100 ba komunidade antes implementa iha teritóriu laran.
“Governu halo hotu ona preparativus, lansamentu ba apoiu $100 ba uma kain ninian no iha tempu badak sei halo ninian implementasaun iha territóriu tomak”, dehan Taur.
Antes ne’e, Prezidente-da-Repúblika rasik liu-hosi diskursu iha tempu EE bolu atensaun ba VIII Governu atu halo planeamentu kona-ba rekuperasaun sosiál no ekonómiku hodi prepara Orsamentu Jerál Estadu – OJE 2020 no 2021 nian.
Tuir Xefe-de-Estadu katak Timor-Leste labele kontinua moris ho situasaun orsamentu duodesimál ne’ebé fó impaktu tebes ba ekonómia rai-laran.
Dadaun ne’e parte VIII Governu konstitusional prepara hela planu OJE 2020 ne’ebé tuir planu sei lori ba Parlamentu Nasional - PN iha fulan Setembru tinan ne’e. (Editór, Guido Soares).