Díli-SMI: Governu liu-hosi Ministru Defeza, Filomeno Paixão de Jesus, hala’o enkontru ho Embaxadora Amerika, Kathleen M. Fitzpatrick hodi ko’alia kona-ba asuntu bilateral iha setór defeza entre Timor-Leste no Estadus Unidus Amerika - EUA iha futuru.
Enkontru bilateral kona-ba koperasaun bilateral ne’e foka liu oinsa EUA bele kontinua disponivél hodi apoiu ba dezenvolvimentu instituisaun FALINTIL Forsa Defeza Timor-Leste – F-FDTL liu-hosi kapasitasaun rekursu umanu no seluk-tan.
“Aresia teb-tebes prontidaun Estados Unidos da America nian hodi kontinua fó apoiu ba dezenvolvimentu F-FDTL”, dehan Ministru Defeza, Filomeno Paixão, iha Díli, Kinta, (04/06).
Hosi rezultadu enkontru ne’e, Ministru rekomenda ba Governu EUA atu reviu fila fali kona-ba asuntu implementasaun programa diálogu bilateral defeza anual nian ne’ebé konkorda ona iha inísiu tinan ne’e iha Hawaii – Amerika.
“Husu Embaixadora atu atualiza kona-bá implementasaun hosi programa sira ne’ebé país rua diskuti no konkorda iha Diálogu Bilateral Defeza anual ne’ebé hala’o tiha ona iha Fevereiru 2020 iha Hawaii, EUA”, dehan Ministru Interinu Interior ne’e.
Durante enkontru, Paixão, haktuir, sei vizita nivél altu hosi Estadu Rhole Island mai TL atu formaliza parseria entre Estadu refere ho Governu Timor-Leste.
Tanba, EUA deside ona Estadu Rhole Island mak sai nu’udar parseiru ho TL hodi kria parseria iha area oi-oin tuir nesesidade rai-laran.
“EUA nomeia ona Estadu Rhode Island nu’udar parseiru Timor-Leste no parte rua sei kria parseria iha área oioin hanesan dezastre natural, kapasitasaun rekursu umanu no seluktan depende nesesidade no prioridade Timor-Leste nian”, haktuir Paixão.
Eis Brigadeiru Jenerál ne’e hatutan, iha enkontru ne’e mós Embaxadora Kathleen apresia ba koperasaun entre nasaun rua liu-liu kona-ba prevensaun COVID-19 ne’ebé durante ne’e sai ameasa boot ba seguransa nasionál.
Asuntu seluk ne’ebé mak sai pontu importante iha diskusaun mak ekipa tékniku hosi EUA sei mai iha TL hodi apoiu implementasaun projetu konstrusaun Aeroportu iha munisípiu Baucau.
Parte EUA deside ona hodi kontribui finaseiru ba kontrusaun Aeroportu iha sidade boot segundu iha TL refere.
“Ekipa sira hosi EUA sei mai Timor-Leste hodi hahu projetu Aeroportu Baucau ne’ebé EUA deside no kompromete ona atu kontribui USD10 milhões hodi hadiak liután Aeroportu refere”, tenik Paixão. (Editór, Rui Soares).