Bobonaro-SMI: Ministru Agrikultura no Peska - MAP, Pedro do Reis, komenta, planeia ona atu bele uza orsamentu COVID-19 ne’ebé aloka ba parte MAP hodi hadi’a irigasaun sira ne’ebé hetan estraga relasiona ho udan-boot durante periodu Estadu Emerjénsia - EE.
“MAP planeia ona, hakarak ou lakoi, irigasaun sira ne'ebe mak sedimentasaun ou rai teen taka, ami sei esforsu aan tomak para bee tenke la'o nafatin. Ho ida nemak ami tun ho ekipa tékniku hosi Diresaun Irigasaun nian hodi observa ho tempu badak ne'e ita bele uza osan COVID-19 nian ne'e ba kustu ita bele hala’o dadaun ona”, dehan Pedro dos Reis, iha Loes, Sabádu, (06/06).
Iha fim de semana ne’e, Ministru Pedro ho ekipa tékniku hala’o ona observasaun direta ba irigasaun sira hosi parte Oeste hanesan irigasaun Loes Sulilaran, Haekou, Maliana-1 no Maliana-2 iha Munisípiu Bobonaro.
Hosi vizita ne’e, Ministru esplika, parte ministériu sei tau perioridade hodi normaliza sedementu sia iha irigasaun hirak ne’e para bele fasilita agrikultor sira nia natar.
"MAP sei esforsu aan oinsa atu hadiak, hanesan kona-ba irigasaun ne'e MAP planeia ona, hakarak ou lakoi, irigasaun sira ne'ebe mak sedimentasaun ou rai teen taka, ami sei esforsu aan tomak para bee tenke la'o nafatin”, dehan Governante ne’e.
Ministru fó razaun hodi fó perioridade ba hadi’a irigasaun atu evita mosu inundasaun boot ne’ebé bele estraga maka’as liu-tan irigasaun sira ne’e.
Nia esplika liu-tan, ministériu nia seluk seluk ne’ebé sai perioridade mak tau orsamentu ba konstrusaun no hadi’a moru protesaun atu nune’e bele asegura irigasaun sira.
Tuir observasaun SMI maioria irigasaun hetan estraga relasiona ho udan-boot durante ne'e iha parte Leste, Oeste no Norte. (Editór, Ajito Soares).